മുഖസൗന്ദര്യം പോലെ തന്നെ പ്രധാനമാണ് കൈകളുടെ ഭംഗിയും. ആളിന്റെ വ്യക്തിത്വം മനസിലാക്കാനും വൃത്തി തിരിച്ചറിയാനുമൊക്കെ കൈകളിലേക്ക് ഒന്നു നോക്കിയാൽ മതി. ദിവസവും മുഖത്തിന് പരിചരണം നൽകുന്നതുപോലെ തന്നെ കൈകൾക്കും ശ്രദ്ധ നൽകണം.
കുളികഴിഞ്ഞും രാത്രി കിടക്കുന്നതിനു മുമ്പും ഹാൻഡ് ക്രീം പുരട്ടി മസാജ് ചെയ്യുക. റോസ് വാട്ടറും ഗ്ലിസറിനും ചേർത്ത് പുരട്ടുന്നതും ഓറഞ്ച് നീരും തേനും ചേർത്ത് പുരട്ടുന്നതും നിറം വർദ്ധിക്കാൻ സഹായിക്കും. നാരങ്ങയുടെ തോട് കൈകളിൽ ഉരസുന്നത് നിറവ്യത്യാസം അകറ്റാൻ സഹായിക്കും. വരണ്ട ചർമമുളളവർക്ക് വേഗത്തിൽ കൈകളിൽ കറുത്ത പാടുകളും ചുളിവുകളും വീഴും. അങ്ങനെയുള്ളവർ ചെറു ചൂടുവെളളത്തിൽ ഉപ്പിട്ട് കുറച്ചു നേരം കൈകൾ മുക്കി വെക്കുക. കഴുകിത്തുടച്ച് പപ്പായ നീരോ തക്കാളി നീരോ പുരട്ടി മസാജ് ചെയ്യുക. പതിനഞ്ച് മിനിറ്റ് കഴിഞ്ഞ് കഴുകിക്കളയാം. നഖങ്ങളുടെ ആരോഗ്യത്തിന് പപ്പായ, കാരറ്റ്, വാഴപ്പഴം തുടങ്ങിയവ കഴിക്കുന്നത് നല്ലതാണ്.
ഇടയ്‌ക്കിടെ ഹാൻഡ് വാഷും സോപ്പും ഉപയോഗിക്കുന്നവരുടെ കൈകളെ എളുപ്പത്തിൽ പ്രായം പിടികൂടും. അതുകൊണ്ട് തന്നെ കൈകൾ വൃത്തിയാക്കാൻ മൈൽഡ് ആയ സോപ്പ് ഫ്രീ ക്ലെൻസർ ഉപയോഗിക്കാം. ഓരോ തവണ കൈ കഴുകിയതിന് ശേഷവും ക്രീം പുരട്ടുന്നതും നല്ലതാണ്. അടുക്കള ജോലികൾ കൂടുതലായി ചെയ്യുന്ന വീട്ടമ്മമാർ കൈകളിലെ എല്ലുകൾ ശക്തമാകാൻ കാത്സ്യം കൂടുതലടങ്ങിയ ഭക്ഷണം കഴിക്കാൻ ശ്രദ്ധിക്കണം.
നാല് സ്‌പൂൺ പൈനാപ്പിൾ ജ്യൂസും മൂന്നു സ്‌പൂൺ ബദാം എണ്ണ ചേർത്ത് മിശ്രിതം തയ്യാറാക്കുക. തുടർന്ന് കൈകൾ പതിനഞ്ചുമിനിട്ടോളം മുക്കി വയ്‌ക്കുക. കൈകളുടെ നഷ്‌ടപ്പെട്ട ഭംഗി വീണ്ടെടുക്കാം. ഒരു പാത്രത്തിൽ കഞ്ഞിവെള്ളമെടുത്ത് വിരലുകൾ 15 മിനിറ്റ് കുതിർത്ത് വെക്കുന്നത് നഖങ്ങൾ പൊട്ടുന്നത് തടയാനുള്ള എളുപ്പവഴിയാണ്. കൈകളുടെ ആരോഗ്യവും ഭംഗിയും വർധിപ്പിക്കാൻ ഇടക്ക് കൈകൾക്ക് വ്യായാമം നൽകണം. കൈത്തലം ചുരുട്ടിപ്പിടിക്കുക. അൽപനേരം കഴിഞ്ഞ് വിരലുകൾ പരമാവധി അകലത്തിൽ വരുന്ന വിധത്തിൽ കൈ നിവർത്തുക.
മൈൽഡ് ഷാംപൂ കലർത്തിയ വെള്ളത്തിൽ 5 മിനിറ്റ് കൈ മുക്കി വെക്കണം. നന്നായി തുടച്ച് ഉണക്കണം. ഇഷ്‌ടമനുസരിച്ച് നഖം വെട്ടി ആകൃതി വരുത്തണം. നഖത്തിന്റെ അരികുകൾ എമറി ബോർഡിൽ ഉരച്ച് ഭംഗിയാക്കാം. ഓറഞ്ച് സ്റ്റിക് കൊണ്ട് നഖത്തിന്റെ ചുറ്റുമുള്ള മൃദു ചർമം ഷെയ്‌പ് ചെയ്യുക. ക്യൂട്ടിക്കിൾ എന്ന ഈ ഭാഗത്തിന് മുറിവേൽക്കാതെ ഷെയ്‌പ് ചെയ്യാൻ ശ്രദ്ധിക്കണം. നഖത്തിന് സമീപം അഭംഗി തോന്നിക്കുന്ന ചെറിയ ചർമഭാഗങ്ങൾ ക്ലിപ്പർ കൊണ്ട് ശ്രദ്ധയോടെ മുറിച്ചു മാറ്റുക. കോട്ടൺ വൂൾ കൊണ്ട് നഖത്തിന് ചുറ്റും തുടച്ച് വൃത്തിയാക്കിയതിന് ശേഷം ക്യൂട്ടിക്കിൾ ക്രീം പുരട്ടി മയപ്പെടുത്തണം. ഇതിന് ശേഷം നല്ല ഹാൻഡ് ക്രീം മുകളിൽ നിന്ന് വിരൽത്തുമ്പുകളിലേക്ക് മസാജ് ചെയ്യാവുന്നതാണ്. വളരെ വരണ്ട ചർമമാണെങ്കിൽ ഏതെങ്കിലും പ്രകൃതിദത്തമായ എണ്ണ ഉപയോഗിച്ച് കൈകൾ നന്നായി മസാജ് ചെയ്യുക. ബദാം എണ്ണയും ഒലീവെണ്ണയും ഉത്തമമാണ്.