ചെന്നൈ: രാഷ്ട്രീയ പ്രവേശനത്തിൽ നിന്ന് പിൻമാറിയതിനെ തുടർന്നുള്ള പ്രതിഷേധങ്ങൾക്കിടെ നടൻ രജനികാന്ത് വിദേശത്തേക്ക്. ജനുവരി 14ന് രജനി സിംഗപ്പൂരിലേക്ക് തിരിക്കും. വിദഗ്‌ദ്ധ പരിശോധനയ്‌ക്കാണ് യാത്രയെന്ന് താരത്തിന്റെ ഓഫീസ് വ്യക്തമാക്കി. ആരാധകരുടെ പ്രതിഷേധം ശക്തമായതിന് ഇടയിലാണ് ചെന്നൈയിൽ നിന്ന് മാറിനിൽക്കാനുള്ള തീരുമാനം.

രജനികാന്ത് രാഷ്ട്രീയ പ്രവേശനത്തിൽ നിന്ന് പിൻമാറിയതോടെ തമിഴ്നാട്ടിൽ ആരാധകരുടെ വ്യാപക പ്രതിഷേധമാണ് ഉടലെടുത്തത്. വിവിധയിടങ്ങളിൽ രജനികാന്തിന്റെ കോലം കത്തിച്ചു. ഇന്നലെ രജനികാന്തിന്റെ വീടിന്റെ മുന്നിൽ ഒരു ആരാധകൻ ആത്മഹത്യക്ക് ശ്രമിക്കുകയും ചെയ്‌തു.

ചെന്നൈ സ്വദേശി മുരുകേശനാണ് തീകൊളുത്തിയത് ആത്മഹത്യക്ക് ശ്രമിച്ചത്. രജനികാന്ത് തീരുമാനം പിൻവലിക്കണമെന്ന് ആവശ്യപ്പെട്ടാണ് ആത്മഹത്യാശ്രമം. ഗുരുതരമായി പൊള്ളലേറ്റ ആരാധകനെ ആശുപത്രിയിലേക്ക് മാറ്റി.