ഇസ്​ലാമാബാദ്​: വടക്കുപടിഞ്ഞാറൻ പാകിസ്ഥാനിൽ ജനക്കൂട്ടം തകർത്ത ഹിന്ദുക്ഷേത്രം പുനർനിർമിക്കാനൊരുങ്ങി പ്രാദേശിക സർക്കാർ. പൂർണ ചെലവും സർക്കാർ വഹിക്കും. ഖൈബർ പഖ്​​തൂൻഖ്വ പ്രവിശ്യയിലെ കാരക് പട്ടണത്തിലെ ശ്രീ പരമഹാൻസ് ജി മഹാരാജ് സമാധി ക്ഷേത്രമാണ്​ ആൾക്കൂട്ടം തകർത്തത്​. പ്രതികളെന്ന്​ സംശയിക്കുന്ന 45ഓളം പേർ പൊലീസ് പിടിയിലായെന്നാണ് റിപ്പോർട്ട്.

പ്രവിശ്യാ സർക്കാർ ഫണ്ട് ഉപയോഗിച്ച് ക്ഷേത്രെ പുനർനിർമിക്കുമെന്ന് മന്ത്രി കമ്രാൻ ബങ്കാഷ് അറിയിച്ചു.

ഹിന്ദുസംഘത്തിന്റെ ഉടമസ്ഥതയിലുള്ള ഒരു കെട്ടിടത്തിന്റെ നവീകരണത്തിൽ പ്രതിഷേധിച്ചാണ്​ ആൾക്കൂട്ടം ക്ഷേത്രത്തിനെതിരെ അക്രമം നടത്തിയത്​.സംഭവസ്ഥലത്ത്​ സുരക്ഷ ഏർപ്പെടുത്തുമെന്നും ഹിന്ദുസമൂഹത്തിന്റെ സഹകരണത്തോടെ പുനർനിർമാണം നടത്തുമെന്നും ബങ്കാഷ്​ അറിയിച്ചു. ക്ഷേത്രം തകർത്തതിനെ തുടർന്ന്​ പാകിസ്ഥാന്റെ വിവിധ കോണുകളിൽനിന്നും പ്രതിഷേധം ഉയർന്നിരുന്നു.