വിയന്ന: പ്രണയാഭ്യർത്ഥന സ്വീകരിച്ചതിന് പിന്നാലെ 650 അടി താഴ്ചയിലേക്ക് വീണ യുവതി അത്ഭുതകരമായി രക്ഷപ്പെട്ടു. ഓസ്ട്രിയയിലെ കരിന്തിയയിൽ ഡിസംബ‌ർ 27നാണ് സംഭവം. ഫാൽക്കർട്ട് പർവതത്തിൽ നിന്ന് ഇരുപത്തിയേഴുകാരനായ ഒരാൾ മുപ്പത്തിരണ്ടുകാരിയായ യുവതിയോട് തന്റെ ഇഷ്ടം തുറന്നുപറയുകയായിരുന്നു.

തനിക്കും ഇഷ്ടമാണെന്ന് യുവതി അറിയിച്ചതിന് പിന്നാലെ കാല് തെന്നി 650 അടി താഴ്ചയിലേക്ക് വീഴുകയായിരുന്നു. യുവതിയെ രക്ഷിക്കാൻ കാമുകൻ ശ്രമിക്കുന്നതിനിടെ അയാളും 50 അടി താഴ്ചയിലേക്ക് വീണു. എന്നാൽ പ്രദേശത്ത് മഞ്ഞുവീഴ്ചയുണ്ടായതിനാൽ യുവതിയ്ക്ക് ഗുരുതരമായ പരിക്കുകളൊന്നും സംഭവിച്ചിരുന്നില്ല.

അബോധാവസ്ഥയിൽ കിടക്കുന്ന യുവതിയെ കണ്ട ഒരു യാത്രക്കാരൻ ഉടൻ ആശുപത്രിയിലെത്തിക്കുകയായിരുന്നു. ഹെലിക്കോപ്റ്റർ ഉപയോഗിച്ചാണ് കാമുകനെ രക്ഷപ്പെടുത്തിയത്. 'ഇരുവരും ഭാഗ്യവാന്മാരാണ്. മഞ്ഞുവീഴ്ചയില്ലായിരുന്നുവെങ്കിൽ സംഭവിക്കുക മറ്റൊന്നാകുമായിരുന്നു.' പൊലീസ് പറഞ്ഞു. സമാന സംഭവങ്ങൾ ഇതിനുമുമ്പും ഉണ്ടായിട്ടുണ്ട്. കഴിഞ്ഞ സെപ്തംബറിൽ ഒരാൾ പ്രണയാഭ്യർത്ഥന നടത്തിയതിന് പിന്നാലെ ബോട്ട് തക‌ർന്ന് വെള്ളത്തിലേക്ക് വീണിരുന്നു.