കാബൂൾ: അഫ്ഗാനിസ്ഥാനിൽ യുവ മാദ്ധ്യമപ്രവർത്തകൻ കൊല്ലപ്പെട്ടു. ജനുവരി ഒന്നിനാണ് സംഭവം നടന്നത്. 28 കാരനായ ബിസ്​മില്ല അദൽ ഐമഖാണ് കൊല്ലപ്പെട്ടത്. ഇതോടെ, രാജ്യത്ത്​ രണ്ടു മാസത്തിനിടെ കൊല്ലപ്പെട്ട മാദ്ധ്യമപ്രവർത്തകരുടെ എണ്ണം അഞ്ചായി.

കേന്ദ്ര പ്രവിശ്യയായ ഘോറിൽ വച്ചാണ്​ റേഡിയോ അവതാരകനായ ബിസ്​മില്ല കൊല്ലപ്പെട്ടത്. സാദ ഏ ഘോർ (ഘോറിന്റെ ശബ്​ദം) റേഡിയോ സ്​റ്റേഷന്റെ എഡിറ്റർ ഇൻ ചീഫായിരുന്നു അദ്ദേഹം. ബിസ്മില്ലയുടെ വാഹനത്തിന് നേരെ അജ്ഞാതനായ അക്രമി വെടിയുതിർക്കുകയായിരുന്നു. ഒപ്പമുണ്ടായിരുന്ന സഹോദരൻ അദ്ഭുതകരമായി രക്ഷപ്പെട്ടു. സംഭവത്തിൽ അഫ്ഗാൻ പ്രസിഡന്റ് അഷ്​റഫ്​ ഗനി നടുക്കം രേഖപ്പെടുത്തി.അഭിപ്രായ സ്വാതന്ത്രം തകർക്കുന്നത്​ അംഗീകരിക്കാനാവില്ലെന്ന്​ സർക്കാർ​ പ്രതികരിച്ചു.