മലയാളികൾ നെഞ്ചിലേറ്റിയ ഒരു പിടി ചലചിത്ര ഗാനങ്ങളുടെ രചയിതാവും ഗായകനുമായ അനിൽ പനച്ചൂരാൻ ഓർമ്മയാകുമ്പോൾ ചലച്ചിത്ര മേഖലയ്ക്ക് ഉണ്ടായിരിക്കുന്നത് നികത്താനാകാത്ത നഷ്ടമാണ്. ലാൽ ജോസ് സംവിധാനം ചെയ്ത അറബിക്കഥയിലെ ​ഗാനങ്ങളിലൂടെയാണ് അനിൽ പനച്ചൂരാൻ മലയാള സിനിമയിലേക്ക് രംഗപ്രവേശം ചെയ്യുന്നത്.

അറബിക്കഥയിലെ ചോര വീണ മണ്ണിൽ എന്ന ​ഗാനം മലയാളികളുടെ മനസിൽ ഇടംനേടിയതോടെ പനച്ചൂരാൻ മലയാള ചലചിത്രമേഖലയുടെ തന്നെ ഭാഗമാവുകയായിരുന്നു. മാടമ്പി, മിന്നാമിന്നിക്കൂട്ടം, ഭ്രമരം, മകന്റെ അച്ഛൻ, മേരിക്കുണ്ടൊരു കുഞ്ഞാട്, വെളിപാടിന്റെ പുസ്തകം തുടങ്ങി ഇരുപതിലേറെ ചിത്രങ്ങൾക്ക് പനച്ചൂരാൻ ഗാനങ്ങൾ രചിച്ചു. കഥ പറയുമ്പോൾ എന്ന ചിത്രത്തിലെ വ്യത്യസ്ഥനാമൊരു ബാർബറാം ബാലനെ എന്ന ഗാനവും വൻ ഹിറ്റായിരുന്നു.

പഴയകാല ഗാനങ്ങൾ മാത്രമല്ല, സമീപ കാലത്തിറങ്ങിയ മോഹൻ ലാൽ നായകനായ വെളിപാടിന്റെ പുസ്തകം എന്ന ചിത്രത്തിൽ ന്യൂജൻ പിള്ളേരെ ഹരം കൊള്ളിച്ച ജിമിക്കി കമ്മൽ എന്ന ഗാനം രചിച്ചതും അനിൽ പനച്ചൂരാനാണ്.അറബിക്കഥയിലെ ചോര വീണ മണ്ണിൽ എന്ന ​ഗാനം ആലപിച്ചിരിക്കുന്നതും അനിൽ പനച്ചൂരാനാണ്. അറബിക്കഥ, മാണിക്യക്കല്ല്, ചില നേരം ചില മനുഷ്യർ, യാത്ര ചോദിക്കാതെ എന്നീ ചിത്രങ്ങളിൽ അദ്ദേഹം അഭിനയിക്കുകയും ചെയ്തു.

വലയിൽ വീണ കിളികൾ, അനാഥൻ, പ്രണയകാലം, ഒരു മഴ പെയ്തെങ്കിൽ, കണ്ണീർക്കനലുകൾ തുടങ്ങിയ കവിതകളിലൂടെയും അനിൽ പനച്ചൂരാൻ മലയാളികൾക്ക് പ്രിയങ്കരനായി.