പല തരത്തിലുള്ള കിളിക്കൂടുകൾ നാം ദിവസവും കാണാറുണ്ട്. എന്നാൽ, മനുഷ്യവാസമുള്ള കിളിക്കൂടുകൾ അത്യപൂർവ്വമാണ്. വീടാണോ കിളിക്കൂടാണോ എന്ന് ആർക്കും സംശയം തോന്നുന്ന തരത്തിലൊരു വീടുണ്ട്,​ അങ്ങ് കാലിഫോർണിയയിൽ. സാധാരണ വീടുകളുടെ രീതിയിലേയല്ല ഈ വീട് നിർമ്മിച്ചിട്ടുള്ളത്. കാലിഫോർണിയ സ്വദേശിയായ ജൈസന്റെ വീടുകളെല്ലാം വമ്പൻ കിളിക്കൂടുകൾ പോലെയുള്ള വിചിത്രനിർമ്മിതികളാണ്. മനുഷ്യർക്ക് താമസിക്കാൻ അനുയോജ്യമായ കിളിക്കൂടുകൾ!

യൂക്കാലി മരങ്ങളുടെ കമ്പുകൾ കൊണ്ടാണ് അദ്ദേഹം കൂടുകൾ നിർമ്മിച്ചിട്ടുള്ളത്. മ​റ്റു ചില്ലകളെ അപേക്ഷിച്ച് ഇവയ്ക്ക് കൂടുതൽ ഈട് ലഭിക്കും എന്നതാണ് കാരണം. വിവിധ സ്ഥലങ്ങളിൽ നിന്ന് ശേഖരിക്കുന്ന കമ്പുകൾ ലോറിയിൽ തന്റെ പണിശാലയിൽ എത്തിച്ചാണ് ജൈസൺ 'ഹ്യൂമൻ നെസ്​റ്റ് ' നിർമ്മിക്കുന്നത്. പിന്നീട് ഇവ ആവശ്യമുള്ള സ്ഥലങ്ങളിൽ കൊണ്ടു പോയി ഇൻസ്​റ്റാൾ ചെയ്യും. കൂടാതെ കമ്പുകൾ വളച്ചെടുക്കാൻ പ്രത്യേക സംവിധാനങ്ങളുമുണ്ട്. സ്‌ക്രൂ ഉപയോഗിച്ചാണ് ഇത് ചെയ്യുന്നത്. സമൂഹമാദ്ധ്യമങ്ങളിൽ പോസ്​റ്റ് ചെയ്ത കിളിവീടുകളുടെ ചിത്രങ്ങൾ വൈറലായതോടെ നിരവധി പേരാണ് ഇത്തരം വീടുകൾ നിർമ്മിച്ചു നൽകാനുള്ള ആവശ്യവുമായി ജയ്സനെ സമീപിക്കുന്നത്.