കായിക മത്സരം നടക്കുന്നതിന് തൊട്ടുമുമ്പ് രാജ്യത്തിന്റെ ദേശീയ ഗാനം കേൾക്കുമ്പോൾ താരങ്ങൾ വികാരാധീനരാകുന്ന നിരവധി സംഭവങ്ങൾക്ക് ആരാധകർ സാക്ഷ്യം വഹിച്ചിട്ടുണ്ട്.ഇപ്പോഴിതാ അത്തരത്തിലുള്ള ഒരു സംഭവത്തിന്റെ വീഡിയോ സോഷ്യൽ മീഡിയയിൽ വൈറലായിക്കൊണ്ടിരിക്കുകയാണ്. ഇന്ത്യൻ പേസർ മുഹമ്മദ് സിറാജ് ആണ് വീഡിയോയിലുള്ളത്.

ഇന്ത്യയും ഓസ്‌ട്രേലിയയും തമ്മിലുള്ള മൂന്നാം ടെസ്റ്റ് ആരംഭിക്കുന്നതിന് തൊട്ടുമുമ്പായിരുന്നു സംഭവം. ദേശീയ ഗാനം കേട്ട് സിറാജ് വികാരാധീനനാവുകയായിരുന്നു. കണ്ണ് നിറയുന്നതും, കണ്ണുനീർ കൈകൊണ്ട് തുടയ്ക്കുന്നതും വീഡിയോയിൽ കാണാം.

✊ #AUSvIND pic.twitter.com/4NK95mVYLN

— cricket.com.au (@cricketcomau) January 6, 2021

സംഭവത്തിന്റെ വീഡിയോ വളരെ പെട്ടന്നാണ് സോഷ്യൽ മീഡിയയിൽ തരംഗമായത്. 'ക്രിക്കറ്റിനോടും, രാജ്യത്തോടുമുള്ള സിറാജിന്റെ സ്‌നേഹത്തിന്റെ പ്രതിഫലനമാണിത്', 'യഥാർത്ഥ രാജ്യസ്‌നേഹം' തുടങ്ങി നിരവധി കമന്റുകളാണ് വീഡിയോയ്ക്ക് താഴെ വന്നുകൊണ്ടിരിക്കുന്നത്. ഇതിന് മുമ്പും ദേശീയ ഗാനം കേട്ട് സിറാജ് വികാരാധീനനായിട്ടുണ്ട്.അന്നും വീഡിയോ വൈറലായിരുന്നു.

ഇത്തവണത്തെ ഓസീസ് പര്യടനത്തില്‍ അപ്രതീക്ഷിതമായിട്ടാണ് സിറാജ് ടീമിൽ എത്തിയത്. മുഹമ്മദ് ഷമിക്ക് പരിക്കേറ്റതോടെയാണ് സിറാജിനെ തേടി ഭാഗ്യമെത്തിയത്. ഓസ്‌ട്രേലിയയ്‌ക്കെതിരായ രണ്ടാം ടെസ്റ്റിൽ 5 വിക്കറ്റ് നേടിയ സിറജ് മൂന്നാം ടെസ്റ്റിലും ഫോം തുടർന്നു. അടുത്തിടെയായിരുന്നു അദ്ദേഹത്തിൻറെ പിതാവ് മരണപ്പെട്ടത്. സിറാജ് ക്രിക്കറ്ററായി കാണാൻ ഏറ്റവും കൂടുതൽ ആഗ്രഹിച്ചത് ഓട്ടോ ഡ്രൈവറായിരുന്ന പിതാവ് ഖൗസായിരുന്നു.