മാംസത്തിന്റെ ഫ്ളേവറുള്ള ഐസ് ക്രീമിനെപ്പറ്റി കേട്ടിട്ടുണ്ടോ? റഷ്യയിലെ മിൻസ്‌ക്ക് ഇൻസ്റ്റിറ്റ്യൂട്ട് ഫോർ മീറ്റ് ആൻഡ് ഡെയറി ആണ് ഇറച്ചിയുടെ ഫ്ളേവറുള്ള ഐസ് ക്രീമിന് പിന്നിൽ. യഥാർത്ഥ ഇറച്ചിയും ഐസ്ക്രീമും ചേർത്ത് തന്നെയാണ് 'ഐസ് മീറ്റ്' തയ്യാറാക്കുന്നത്. ബെലാഗ്രോ 2020 എക്സിബിഷനിലാണ് മിൻസ്‌ക്ക് ഇൻസ്റ്റിറ്റ്യൂട്ട് ഐസ് മീറ്റ് ആദ്യമായി അവതരിപ്പിച്ചത്.
എങ്ങനെയാണ് ഐസ് മീറ്റ് തയ്യാറാക്കുന്നത് എന്ന് വ്യക്തമാക്കുന്ന വീഡിയോ നിരവധി പേരാണ് യൂട്യൂബിലൂടെ കണ്ടത്. ഒന്നര മിനിറ്റ് ദൈർഘ്യമുള്ള വീഡിയോയിൽ പാലുൾപ്പെടെയുള്ള ഡയറി ഉത്പന്നങ്ങളും ഇറച്ചിയും ഐസ്ക്രീം തയ്യാറാക്കുന്ന യന്ത്റത്തിലേക്ക് കയറ്റുന്നതും താഴെയുള്ള പൈപ്പിലൂടെ അല്പം കട്ടിയോടെ ഐസ് മീറ്റ് പുറത്ത് വരുന്നതും കാണാം. ഇറച്ചി ഉത്പന്ന വിഭാഗത്തിലെ മുതിർന്ന ഗവേഷകയായ ഐറിന കൽടോവിച്ചിന്റെ അഭിപ്രായത്തിൽ ഐസ് മീറ്റ് ഉന്മേഷകരവും ആരോഗ്യകരവുമായ ഉത്പന്നമാണ്. ഒരു ലഘുഭക്ഷണം എന്ന നിലയ്ക്ക് അനുയോജ്യമാണ് ഐസ് മീറ്റ്. മാത്രവുമല്ല ഐസ് മീറ്റിൽ പ്രോട്ടീനും കൊഴുപ്പും അടങ്ങിയിട്ടുണ്ട്. പഞ്ചസാര ചേർത്തിട്ടില്ലാത്തതുകൊണ്ട് ഐസ് മീറ്റ് പ്രമേഹമുള്ളവർക്കും ഉപയോഗിക്കാം. എന്നാൽ, ഐസ് മീറ്റിന് ഇന്റർനെറ്റ് ലോകത്ത് വലിയ ശ്രദ്ധ പിടിച്ചു പറ്റാൻ കഴിഞ്ഞിട്ടില്ല. ഇത്തരത്തിലുള്ള ഒരു ഐസ്ക്രീം ഫ്ളേവർ എന്തിന് തയ്യാറാക്കി എന്നാണ് പലരും പ്രതികരിച്ചിട്ടുള്ളത്.