ലണ്ടൻ: ബ്രിട്ടീഷ് രാജ്ഞി എലിസബത്തും ഭർത്താവ് ഫിലിപ്പ് രാജകുമാരനും കൊവിഡ് വാക്സിന്റെ ആദ്യ ഡോസ് സ്വീകരിച്ചു. ശനിയാഴ്ച വിൻഡ്​സർ കാസിലിൽ വച്ചാണ് 94 കാരിയായ രാജ്ഞിയും 99 കാരനായ രാജകുമാരനും വാക്സിൻ സ്വീകരിച്ചത്. പ്രായാധിക്യം കണക്കിലെടുത്ത് കൊവിഡ് കാലത്ത് ഇരുവരും വിന്‍ഡ്‌സർ കൊട്ടാരത്തിലാണ് കഴിഞ്ഞിരുന്നത്. ബക്കിംഗ്ഹാം കൊട്ടാരം വക്താവ് തന്നെയാണ് രാജ്ഞി വാക്സിൻ സ്വീകരിച്ചെന്ന് ഔദ്യോഗികമായി വ്യക്തമാക്കിയത്. രാജ്ഞിയുടെ ആരോഗ്യവിഷയത്തിൽ അഭ്യൂഹങ്ങൾ പ്രചരിക്കാതിരിക്കാനും വാക്‌സിൻ സ്വീകരിച്ച കാര്യം ജനങ്ങളെ അറിയിക്കാനുള്ള നിർദ്ദേശപ്രകാരവുമാണ് വാർത്ത പുറത്ത് വിട്ടതെന്ന് ഔദ്യോഗിക വാർത്താക്കുറിപ്പിൽ വ്യക്തമാക്കി. കൊവിഡ് പ്രോട്ടോക്കോൾ പാലിച്ച് ഐസലേഷനിലായിരുന്നതിനാൽ പരാമ്പരാഗതമായി ആചരിച്ച് വന്നിരുന്ന ക്രിസ്മസ് ആഘോഷങ്ങളും രാജ്ഞി ഇത്തവണ റദ്ദാക്കിയിരുന്നു. ബ്രിട്ടനിലെ 1.5 ദശലക്ഷത്തിലധികം പേർ ഇതുവരെ വാക്സിൻ സ്വീകരിച്ചു. പ്രായമായവർ, അവരെ പരിചരിക്കുന്നവർ, ആരോഗ്യപ്രവർത്തകർ തുടങ്ങിയവർക്കാണ് വാക്സിനേഷനിൽ മുൻഗണന നൽകുന്നത്. ഫെബ്രുവരി പകുതിയോടെ മുൻഗണന വിഭാഗത്തിൽ ഉൾപ്പെ​ട്ട 15 മില്ല്യൺ ആളുകൾക്ക്​ വാക്​സിൻ എത്തിക്കാനാണ്​ ബ്രിട്ടന്റെ നീക്കം. ഇതിൽ 70 വയസിന്​ മുകളിലുള്ളവരും ആരോഗ്യ പ്രവർത്തകരും ആശുപത്രി ജീവനക്കാരും ഉൾപ്പെടും.