ന്യൂഡൽഹി: കേന്ദ്രബജറ്റിന് ദിവസങ്ങൾ മാത്രം ശേഷിക്കെ കൊവിഡ് വ്യാപനത്തെതുടർന്ന് ഇത്തവണ ബ‌്ഡ്‌ജറ്റ് പേപ്പറുകൾ അച്ചടിക്കേണ്ടെന്ന് കേന്ദ്രസർക്കാർ തീരുമാനം. അതിനുപകരം സോഫ്‌റ്റ് കോപ്പികളാകും വിതരണം ചെയ്യുക. സാമ്പത്തിക സർവെയും അച്ചടിക്കില്ല. പാർലമെന്റ് അംഗങ്ങൾക്കെല്ലാം സോഫ്‌റ്റ്‌ കോപ്പികളാകും നൽകുക. സ്വാതന്ത്ര്യത്തിനുശേഷം ഇതാദ്യമായാണ് രാജ്യത്ത് അച്ചടിക്കാത്ത കോപ്പികളുമായി ബജറ്റ് അവതരിപ്പിക്കുന്നത്.

ധനമന്ത്രാലയത്തിലുളള പ്രസിലാണ് എല്ലാവർഷവും ബഡ്‌ജറ്റ് പേപ്പറുകൾ അച്ചടിക്കാറുളളത്. അച്ചടിച്ച് മുദ്ര വച്ച് വിതരണംചെയ്യുന്നതിനായി രണ്ടാഴ്‌ചയോളം സമയമെടുക്കുമായിരുന്നു. നൂറോളം ജീവനക്കാരാണ് ഇതുമായി ബന്ധപ്പെട്ട് പ്രവർത്തിച്ചിരുന്നത്. ഫെബ്രുവരി ഒന്നിനാണ് ധനമന്ത്രി നിർമ്മല സീതാരാമൻ കേന്ദ്ര ബഡ്‌ജറ്റ് അവതരിപ്പിക്കുന്നത്.

പാർലമെന്റിലെ ബഡ്‌ജറ്റ് സമ്മേളനം ജനുവരി 29ന് ആരംഭിച്ച് ഏപ്രിൽ എട്ടുവരെ തുടരും. ആദ്യ സെഷൻ ഫെബ്രുവരി 15വരെയും രണ്ടാമത്തേത് മാർച്ച് എട്ടുമുതലുമാകും നടക്കുക. ഫെബ്രുവരി 16 മുതൽ മാർച്ച് ഏഴുവരെയുളള സെഷനിൽ ഇടവേളകളുണ്ടാകും. കൊവിഡ് വ്യാപനത്തെതുടർന്ന് കഴിഞ്ഞവർഷം പാർലമെന്റിന്റെ ശീതകാലസമ്മേളനം നടന്നിരുന്നില്ല.