കൊച്ചി: ഐ.ടി ഓഹരികളുടെ മികച്ച പ്രകടനത്തിന്റെ കരുത്തിൽ ഇന്ത്യൻ ഓഹരി സൂചികകൾ ഇന്നലെ പുത്തൻ ഉയരത്തിൽ വ്യാപാരം അവസാനിപ്പിച്ചു. 486 പോയിന്റ് നേട്ടവുമായി 49,​269ലാണ് സെൻസെക്‌സുള്ളത്. 137 പോയിന്റ് മുന്നേറിയ നിഫ്‌റ്റി 14,484ലുമെത്തി. രണ്ടും എക്കാലത്തെയും ഉയർന്ന ക്ളോസിംഗ് പോയിന്റാണ്.

ഇന്ത്യയിലെ ഏറ്റവും വലിയ ഐ.ടി കമ്പനിയായ ടി.സി.എസിന്റെ മികച്ച മൂന്നാംപാദ പ്രവർത്തനഫലത്തിന്റെ ആവേശത്തിൽ ഐ.ടി ഓഹരികളിലാകെ ഇന്നലെ മികച്ച വാങ്ങൽ ദൃശ്യമായി. മാരുതി സുസുക്കി,​ ബജാജ് ഓട്ടോ തുടങ്ങിയ ഓഹരികളുടെ മുന്നേറ്റവും തുണയായി. കൊവിഡ് കേസുകൾ കുറയുന്നതും വാക്‌സിൻ സജ്ജമാകുന്നതും നിക്ഷേപകർക്ക് ആവേശം പകർന്നു. വിദേശ പോർട്ട്ഫോളിയോ നിക്ഷേപകർ (എഫ്.പി.ഐ)​ ഇന്ത്യൻ ഓഹരികൾ വൻതോതിൽ വാങ്ങിക്കൂട്ടുന്നതും നേട്ടമാവുകയാണ്.