പാലക്കാട്: ഒലവക്കോട് യുവതിയെ തീകൊളുത്തി കൊല്ലാൻ ഭർത്താവിന്റെ ശ്രമം. ബ്യൂട്ടീഷൻ കോഴ്‌സ് പഠിക്കുന്ന സരിതയുടെ ക്ലാസ്‌മുറിയിൽ എത്തിയായിരുന്നു ഭർത്താവ് ബാബുരാജ് പെട്രോളൊഴിച്ച് കൊല്ലാൻ ശ്രമിച്ചത്. ഓടി മാറിയത് കൊണ്ട് സരിത രക്ഷപ്പെടുകയായിരുന്നു. ബാബുരാജിന് എതിരെ പൊലീസ് വധശ്രമത്തിന് കേസെടുത്തു. പെട്രോൾ ശരീരത്തിൽ ഒഴിച്ച ശേഷം ലൈറ്ററെടുത്ത് കത്തിക്കാൻ ശ്രമിക്കവെയാണ് സരിത ഓടിയത്.

ഇവർ തമ്മിൽ കുടുംബ പ്രശ്‌നങ്ങൾ ഉണ്ടായിരുന്നുവെന്നാണ് വിവരം. ഇന്ന് രാവിലെ ബ്യൂട്ടീഷൻ കോഴ്‌സ് പഠിക്കുന്നതുമായി ബന്ധപ്പെട്ട് ഇരുവരും തമ്മിൽ വഴക്ക് നടന്നിരുന്നു. തുടർന്നായിരുന്നു ക്ലാസ് മുറിയിലെത്തി ബാബുരാജ് സരിതയെ പെട്രോളൊഴിച്ച് കത്തിക്കാൻ ശ്രമിച്ചത്. ബാബുരാജിനെ നാട്ടുകാർ പിടിച്ചുവച്ചിരുന്നുവെങ്കിലും ഇയാൾ ഓടി രക്ഷപ്പെടുകയായിരുന്നു. പിന്നീട് മലമ്പുഴ പൊലീസ് സ്റ്റേഷനിലെത്തി കീഴടങ്ങി.