മുംബയ്: ഓടിക്കൊണ്ടിരുന്ന ട്രെയിനിൽ നിന്ന് ഭർത്താവ് ഭാര്യയെ തള്ളിയിട്ട് കൊലപ്പെടുത്തിയതായി റിപ്പോർട്ട്. മുംബയിലെ ലോക്കൽ ട്രെയിനിൽ വച്ചാണ് സംഭവമുണ്ടായത്. 26കാരിയായ യുവതി ട്രെയിനിന്റെ വാതിലിന് സമീപത്ത് നിൽക്കുമ്പോൾ ഭർത്താവ് പുറത്തേക്ക് തള്ളിയിട്ടതായാണ് ദൃക്‌സാക്ഷികൾ പറയുന്നത്.

തിങ്കളാഴ്ച ഉച്ചകഴിഞ്ഞ് ചെമ്പൂർ-ഗോവണ്ടി റെയിൽവേ സ്‌റ്റേഷനുകൾക്കിടയിലാണ് സംഭവമുണ്ടായത്. യുവതിയുടെ ആദ്യവിവാഹത്തിലുണ്ടായ ഏഴ് വയസുകാരിയായ മകളോടൊപ്പം മുംബയിലെ ലോക്കൽ ട്രെയിനിൽ യാത്ര ചെയ്യുകയായിരുന്നു. ട്രെയിനിന്റെ വാതിലിനരികിൽ നിൽക്കുമ്പോൾ ഭർത്താവ് ഭാര്യയെ പുറത്തേക്ക് തള്ളുകയായിരുന്നു. യുവതി ട്രാക്കിലേക്ക് വീണു. ഇത് കണ്ട യാത്രക്കാരിൽ ഒരാൾ ട്രെയിൻ ഗോവണ്ടി സ്‌റ്റേഷനിലെത്തിയപ്പോൾ പൊലീസിനെ വിവരം അറിയിച്ചു. ട്രെയിനിൽ നിന്ന് വീണ് ബോധരഹിതയായി ട്രാക്കിൽ കിടന്ന യുവതിയെ പിന്നീട് കണ്ടെത്തി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തെ തുടർന്ന് യുവതിയുടെ ഭർത്താവിനെ അറസ്റ്റ് ചെയ്തു.

ഇവരുടെ വിവാഹം കഴിഞ്ഞിട്ട് രണ്ട് മാസമേ ആയിട്ടുള്ളൂ എന്ന് പൊലീസ് വ്യക്തമാക്കി. യുവതിയുടെ കുട്ടിയെ ബന്ധുക്കൾക്ക് കൈമാറിയിട്ടുണ്ട്.