വാഷിംഗ്ടൺ: ഞരമ്പിലേക്ക് സ്വന്തമായി തയ്യാറാക്കിയ മാജിക് മഷ്റൂം ചായ കുത്തിവച്ച യുവാവിന്റെ ശരീരത്തിൽ കൂണുകൾ പൊട്ടിമുളച്ചു. ജേണൽ ഒഫ് അക്കാദമി ഓഫ് കൺസൾട്ടേഷൻ ലൈസൻ സൈക്കാട്രിയാണ് ഇത് സംബന്ധിച്ച റിപ്പോർട്ട് പ്രസിദ്ധീകരിച്ചത്.

ഒപിയോയിഡ് ഡിപെൻഡൻസ് ആൻഡ് ഡിപ്രഷൻ എന്ന വിഷാദ രോഗത്തിനുള്ള മരുന്നായാണ് 30 കാരനായ യുവാവ് കൂൺ ചായ കുത്തിവച്ചത്. ബൈപോളാർ ഡിസോഡറുമുള്ള യുവാവ് ഡോക്ടർമാർ നിർദ്ദേശിച്ച മരുന്ന് കഴിയ്ക്കുന്നത് നിറുത്തിയിരുന്നു.

തുടർന്ന്, ഇന്റർനെറ്റിലൂടെ യുവാവ് 200 കൂൺ വർഗങ്ങളെക്കുറിച്ച് മനസിലാക്കി. നിരാശ, ഉത്കണ്ഠ തുടങ്ങിയ ബുദ്ധിമുട്ടുകൾക്ക് കൂൺ ഉത്തമ മരുന്നാണെന്ന് യുവാവ് ഇന്റർനെറ്റിൽ വായിച്ചു. കൂണുകൾ വെള്ളത്തിൽ തിളപ്പിച്ച് കോട്ടൺ തുണിയിൽ അരിച്ചെടുത്ത് നേരിട്ട് കയ്യിലെ ഞരമ്പിലേക്ക് യുവാവ് കുത്തിവച്ചു. ഇതിന് ശേഷം യുവാവിന്റെ ഞരമ്പിനുള്ളിൽ കൂണുകൾ പൊട്ടിമുളച്ചു. രണ്ട് ദിവസത്തിന് ശേഷം യുവാവിന് ക്ഷീണവും മഞ്ഞപ്പിത്തം, വയറിളക്കം, ഓക്കാനം തുടങ്ങിയവും അനുഭവപ്പെട്ടു. ആശുപത്രിയിൽ പ്രവേശിപ്പിച്ച യുവാവിന്റെ കരളും വൃക്കയും തകരാറിലായതായി ഡോക്ടർമാർ കണ്ടെത്തി. കൂൺ വളരുന്നത് തടയാൻ യുവാവിന്റെ രക്തം പലതവണ മാറ്റി. നീണ്ട 22 ദിവസത്തെ ആശുപത്രി വാസത്തിനിടെ യുവാവിന്റെ ആരോഗ്യനില മെച്ചപ്പെട്ടു. അതേസമയം, ശരീരത്തിനുള്ളിലെ കൂൺ വളർച്ച തടയുന്നതിനായുള്ള മരുന്നുകൾ യുവാവ് ഇപ്പോഴും കഴിയ്ക്കുകയാണ്.