ലണ്ടൻ: കോടികൾ വിലവരുന്ന 7,500 ബിറ്റ്​കോയിനുകളുടെ ഡിജിറ്റൽ ശേഖരം സൂക്ഷിച്ച കമ്പ്യൂട്ടർ ഹാർഡ്​ ഡ്രൈവ്​ അശ്രദ്ധമായി ചവറുകൂനയിലെറിഞ്ഞ് യുവാവ്. 2013ൽ,​ ബിറ്റ്കോയിനുകൾക്ക് മൂല്യമില്ലാതിരുന്ന സമയത്താണ് വെയിൽസ് സ്വദേശിയായ ജയിംസ്​ ഹോവെൽസ് ഹാർഡ്​ ഡ്രൈവ്​ മുനിസിപ്പാലിറ്റി ചവറുകൂനയിൽ കളഞ്ഞത്​.പിന്നീട്,​ ബിറ്റ്കോയിനുകളുടെ വില കുത്തനെ ഉയർന്നപ്പോഴാണ് ജയിംസ് ഹാർഡ് ഡ്രൈവിനെക്കുറിച്ച് ഓർത്തതും തെരച്ചിൽ ആരംഭിച്ചതും. വെയിൽസിലെ ന്യൂപോർട്ട്​ സിറ്റി കൗൺസിലിനു കീഴിലെ മാലിന്യക്കൂനയിൽ ഹാർഡ്​ ഡ്രൈവ്​ ഇപ്പോഴും കാണുമെന്ന നിഗമനത്തിൽ അധികൃതരെ സമീപിച്ച ജയിംസ്​ അവർക്ക് വാഗ്​ദാനം​ ചെയ്​തത്​ ബിറ്റ്​കോയിൻ ശേഖരത്തിന്റെ നാലിലൊന്നാണ്​. 500 കോടിയിലേറെ രൂപ മൂല്യം ഇതിന് മാത്രം വരും. ഹാർഡ്​ ഡ്രൈവ്​ ഉണ്ടാകാൻ സാദ്ധ്യതയുള്ള ഭാഗം കുഴിക്കാൻ അനുവദിക്കണമെന്നാണ്​ ജയിംസിന്റെ അപേക്ഷ. നിലവിൽ ഒരു ബിറ്റ്​കോയിൻ 37,000 ഡോളറിനാണ്​ വിൽക്കുന്നത്​. എന്നുവെച്ചാൽ, 7500 ബിറ്റ്​കോയിനുകളുടെ മൂല്യം കോടികളാണ്. തന്റെ ബിറ്റ്​കോയിനുകൾക്ക്​ 90 ലക്ഷം ഡോളർ മൂല്യമുള്ള കാലത്തായിരുന്നു ഹാർഡ്​ ഡ്രൈവ്​ കാണാനില്ലെന്ന വിവരം യുവാവ്​ മനസിലാക്കിയത്. നിലവിലെ മൂല്യം കണക്കാക്കിയാൽ ഇവക്ക്​ 273 ദശലക്ഷം ഡോളർ വരും. 2013 മുതൽ ബിറ്റ്കോയിനുകൾ തിരഞ്ഞ് യുവാവ് തങ്ങളുടെ പിന്നാലെയുണ്ടെന്ന്​ ന്യൂപോർട്ട്​ സിറ്റി കൗൺസിൽ അധികൃതർ പറയുന്നു. അപേക്ഷ തള്ളിയി​ട്ടില്ലെങ്കിലും നിലവിൽ പരിസ്ഥിതി പ്രശ്​ന മൂലം ​മാലിന്യശേഖരം കുഴിക്കാൻ അനുമതിയില്ലെന്ന് അധൃതർ പറയുന്നു.

 ബിറ്റ്കോയിൻ

2009ൽ സതോഷി നകാമോട്ടായെന്നയാളാണ് ബി​റ്റ്​കോയിൻ എന്ന ഡിജിറ്റൽ കറൻസി വികസിപ്പിച്ചത്. സതോഷിയെക്കുറിച്ച് കൂടുതൽ വിവരങ്ങളൊന്നും ലഭ്യമല്ല. ഇയാൾ ജപ്പാൻകാരനാണെന്നാണ് വിവരം. എന്നാൽ, ഇങ്ങനെയൊരാൾ യഥാർത്ഥത്തിൽ ജീവിച്ചിരിപ്പുണ്ടോയെന്ന് പോലും ഉറപ്പില്ല. ഓരോ വ്യക്​തിയുടെയും സാ​ങ്കേതിക ഉപകരണങ്ങളുടെ ഡിജിറ്റൽ വാലറ്റിൽ സൂക്ഷിച്ച കമ്പ്യൂട്ടർ ഫയലുകളാണ്​ ബിറ്റ്​കോയിനുകൾ. ഇവ പിന്നീട്​ പണം കൈമാറ്റത്തിനുൾപ്പെടെ ഉപയോഗിക്കാം.