ന്യൂഡൽഹി: ബോളിവുഡ് താരം സെയ്ഫ് അലി ഖാൻ പ്രധാന കഥാപാത്രമായി എത്തുന്ന 'താണ്ഡവ്' എന്ന ആമസോൺ പ്രൈമിന്റെ വെബ് സീരീസ് മതവികാരം വ്രണപ്പെടുത്തുന്നുവെന്ന ബിജെപിയുടെ പരാതിയെ തുടർന്ന് നോട്ടീസയച്ച് വാർത്താ വിതരണ പ്രക്ഷേപണ മന്ത്രാലയം. സംവിധായകന്‍ അലി ആബാസ് സഫര്‍, നടന്‍ സൈഫ് അലി ഖാന്‍ എന്നിവര്‍ക്കെതിരെ ചണ്ഡിഗഡ് പോലീസിലും ബിജെപി പരാതി നല്‍കിയിരുന്നു.
ഇതേത്തുടർന്നാണ് വെബ് സീരീസിന്റെ അണിയറപ്രവർത്തകരോട് വാർത്താ വിതരണ പ്രക്ഷേപണ മന്ത്രാലയം വിശദീകരണം തേടിയത്. താണ്ഡവ് നിരോധിക്കണമെന്നും ഒടിടി പ്ലാറ്റ്ഫോമുകൾക്ക് നിയന്ത്രണ അതോറിറ്റി വേണമെന്നും ആവശ്യപ്പെട്ടാണ് ബിജെപി എംപി മനോജ് കൊട്ടക് കേന്ദ്രമന്ത്രി പ്രകാശ് ജാവദേക്കറിന് കത്തെഴുതിയത്. സീരീസ് ഹിന്ദു ദൈവങ്ങളെ മനഃപൂർവം പരിഹസിക്കുകയും മതവികാരങ്ങളെ അവഹേളിക്കുകയും ചെയ്തെന്നും കൊട്ടക് ആരോപിച്ചു.
ഓൺലൈൻ പ്ലാറ്റ്ഫോമുകളിൽ സെൻസർഷിപ്പിന്റെ അഭാവമുള്ളതിനാൽ ഹിന്ദു വികാരങ്ങൾ ആവർത്തിച്ച് ആക്രമിക്കപ്പെടുകയാണെന്നും ഒടിടിയിൽ അടുത്തിടെ സംപ്രേഷണം ചെയ്ത പരിപാടികളിൽ ലൈംഗികത, അക്രമം, മയക്കുമരുന്ന്, പീഡനം, വെറുപ്പ്, അശ്ലീലത എന്നിവ നിറഞ്ഞിരിക്കുകയാണെന്നും കൊട്ടക് പറയുന്നുണ്ട്.
ബോളിവുഡ് താരം സെയ്ഫ് അലി ഖാൻ ഉൾപ്പെടെയുള്ള താരനിര അണിനിരന്ന ആമസോൺ പ്രൈമിലെ വെബ് സീരീസ് നിരോധിക്കണമെന്നാണ് ബിജെപിയുടെആവശ്യം. അഭിനേതാക്കൾ, നിർമ്മാതാക്കൾ, സംവിധായകൻ എന്നിവർക്കെതിരെ കർശന നടപടി സ്വീകരിക്കണമെന്ന് ആവശ്യപ്പെട്ട് ബിജെപി എം‌എൽ‌എ രാം കദമും മുംബയ്‌ ഘാട്കോപർ പൊലീസ് സ്റ്റേഷനിൽ പരാതി നൽകിയിരുന്നു.