കൊല്ലം: കടയ്ക്കലിൽ നിന്ന് കാണാതായ വീട്ടമ്മയെ തൂങ്ങിമരിച്ച നിലയിൽ കണ്ടെത്തി. കടയ്ക്കൽ ചിങ്ങേലി ശ്രീമന്ദിരത്തിൽ ഇന്ദിരാമ്മയാണ് മരിച്ചത്. കുടുംബ പ്രശ്‌നങ്ങളെത്തുടർന്ന് കഴിഞ്ഞ ദിവസമാണ് അറുപത്തൊന്നുകാരിയായ ഇന്ദിരാമ്മ വീടുവിട്ടിറങ്ങിയത്. ഏറെ നേരമായി തിരിച്ചെത്താതായതോടെ കുടുംബം പൊലീസിൽ പരാതി നൽകുകയായിരുന്നു.

പൊലീസ് നടത്തിയ തിരച്ചിലിൽ ചടയമംഗലത്തിന് സമീപം മുരുക്കുമണ്ണിൽ എംസി റോഡിനോട് ചേർന്നുള്ള റബ്ബർതോട്ടത്തിലാണ് ഇന്ദിരാമ്മയെ തൂങ്ങിമരിച്ച നിലയിൽ കണ്ടെത്തിയത്. മൃതദേഹത്തിന്റെ രണ്ട് കൈ ഞരമ്പുകളും അറുത്ത നിലയിലായിരുന്നു. തൊട്ടടുത്തുള്ള മറ്റൊരു മരത്തിലും തൂങ്ങിമരിക്കാൻ ശ്രമിച്ചതിന്റെ ലക്ഷണങ്ങൾ ഉണ്ട്. മൃതദേഹം പോസ്റ്റ്‌മോർട്ടത്തിനായി പാരിപ്പള്ളി മെഡിക്കൽ കോളേജിലേക്ക് മാറ്റി.