വാഷിംഗ്​ടൺ: ജോ ബൈഡൻ അമേരിക്കൻ പ്രസിഡന്റായി അധികാരമേറ്റെടുത്തപ്പോൾ കരുത്തായി ഒപ്പം തന്നെ ഭാര്യ ജിൽ ട്രേസി ബൈഡനുമുണ്ട്. ആദ്യ ഭാര്യ നെയ്ലിയ ഹണ്ടറും മകൾ നവോമിയും അപകടത്തിൽ മരിച്ചതിന്റെ ദുഃഖത്തിൽ കഴിയുമ്പോഴാണ് ബൈഡൻ ജില്ലിനെ പരിചയപ്പെടുന്നത്. ആ സമയതത് ആദ്യ ഭർത്താവ്​ ബിൽ സ്റ്റീവൻസണു​മായി പിരിഞ്ഞുകഴിയുകയായിരുന്നു ജിൽ​. 1977ജൂൺ 17ന് ഇരുവരും വിവാഹിതരായി. 1981ൽ ഇരുവർക്കും ആഷ്​ലി എന്ന മകൾ ജനിച്ചു.

 അദ്ധ്യാപനമേ ജീവിതം

ഇംഗ്ലീഷ്​ പ്രഫസറായ ജിൽ അദ്ധ്യാപകവൃത്തിയെ വളരെയധികം സ്നേഹിക്കുന്നുണ്ട്. സെക്കൻഡ് ലേഡിയായിരുന്ന സമയത്ത് ലോകമെമ്പാടുമുള്ള പെൺകുട്ടികളുടെയും സ്​ത്രീകളുടെയും വിദ്യാഭ്യാസത്തിനായി അവർ പ്രവർത്തിച്ചു. അക്കാലയളവിൽ നാൽപതോളം രാജ്യങ്ങൾ സന്ദർശിച്ച് അവിടത്തെ മിലിട്ടറി ബേസുകൾ, ആശുപത്രികൾ, അഭയാർത്ഥി കേന്ദ്രങ്ങൾ എന്നിവിടങ്ങളിലെത്തി സ്​ത്രീകളുടെയും പെൺകുട്ടികളുടെയും വിദ്യാഭ്യാസ, സാമ്പത്തിക ശാക്തീകരണത്തിനായി പ്രവർത്തിച്ചിരുന്നു ജിൽ.

 കാൻസർ ബോധവത്കരണം

അർബുദരോഗത്തെ കണ്ടെത്തേണ്ടതിന്റേയും ചികിത്സിക്കേണ്ടതിന്റേയും പ്രധാന്യം നേരത്തെ മനസിലാക്കിയ ജിൽ ഇതിന്റെ ഭാഗമായി 1993ൽ അർബുദ പ്രതിരോധത്തിനായുള്ള പദ്ധതികൾ​ക്ക്​ തുടക്കമിട്ടു. തുടർന്ന്​ ഡെലവയറിലെ ഹൈസ്​കൂളിലെ പെൺകുട്ടികളെ അർബുദം ​കണ്ടെത്തേണ്ടതിന്റെ പ്രാധാന്യം മനസിലാക്കിക്കാൻ ബൈഡൻ ബ്രസ്റ്റ്​ ഹെൽത്ത്​ ഇനിഷ്യേറ്റീവ്​ ആരംഭിച്ചു​. 2015ൽ ബൈഡന്റെ മകൻ ബ്യൂ മസ്​തിഷ്കാർബുദം ബാധിച്ച്​ മരിച്ചതോടെ അർബുദം നേരത്തേ കണ്ടെത്തുന്നതിനും ചികിത്സിക്കുന്നതിനുമായി ജിൽ വൈറ്റ്​ ഹൗസ്​ കാൻസർ മൂൺഷോട്ട്​ ആരംഭിച്ചു.

 പുസ്തകങ്ങൾ

ജിൽ എഴുതി 2019ൽ പ്രസിദ്ധീകരിച്ച 'വേർ ദ ലൈറ്റ്​ എന്റേഴ്സ്​: ബിൽഡിംഗ് എ ഫാമിലി, ഡിസ്കവറിംഗ്​ മൈസെൽഫ്​' എന്ന പുസ്തകം ഏറ്റവും കൂടുതൽ വിറ്റഴിക്കപ്പെട്ട പുസ്തകങ്ങളിൽ ഒന്നാണ്. ​രണ്ടാമത്തെ പുസ്​തകമായ ജോയ്; ദ സ്​റ്റോറി ഒഫ്​ ജോ ബൈഡൻ 20​20ൽ പ്രസിദ്ധീകരിച്ചു.