രോഹിത് വിഎസ് സംവിധാനം ചെയ്യുന്ന ടോവിനോ തോമസ് ചിത്രം'കള'യുടെ ടീസർ യൂട്യൂബ് വഴി പുറത്തിറങ്ങി. വേഗത്തിലുള്ള സംഗീതവും ദുരൂഹത ജനിപ്പിക്കുന്ന ഛായാഗ്രഹണവും മറ്റുമായി 'കള' ഒരു ത്രില്ലർ സ്വഭാവത്തിലുള്ള സിനിമയാണെന്ന് സൂചനയാണ് ടീസർ നൽകുന്നത്. ടോവിനോയുടെ ജന്മദിനത്തിലാണ് ടീസർ പുറത്തിറക്കിയതെന്ന പ്രത്യേകതയുമുണ്ട്.
'ഇബ്ലീസ്', 'അഡ്‌വെഞ്ചേഴ്‌സ് ഒഫ് ഓമനക്കുട്ടൻ' എന്നീ ചിത്രങ്ങൾ സംവിധാനം ചെയ്ത രോഹിതിന്റെ മൂന്നാമത്തെ ചിത്രമാണ് 'കള'. യദു പുഷ്‍പാകരനും രോഹിത് വിഎസും ചേര്‍ന്നാണ് ചിത്രത്തിന്റെ രചന നിര്‍വ്വഹിക്കുന്നത്. ചിത്രത്തിൽ ലാലും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. കളയുടെ ചിത്രീകരണത്തിനിടെയായിരുന്നു ടോവിനോയ്ക്ക് പരിക്കേറ്റിരുന്നത്.
ഛായാഗ്രഹണം അഖില്‍ ജോര്‍ജ്. എഡിറ്റിംഗ് ലിവിങ്സ്റ്റണ്‍ മാത്യു. ശബ്ദ സംവിധാനം ഡോണ്‍ വിന്‍സെന്‍റ്. അസോസിയേറ്റ് ഡയറക്ടേഴ്‍സ് ബാസിദ് അല്‍ ഗസാലി, സജൊ. പബ്ലിസിറ്റി പവിശങ്കര്‍. അഡ്വഞ്ചര്‍ കമ്പനിയുടെ ബാനറില്‍ സിജു മാത്യു, നാവിസ് സേവ്യര്‍ എന്നിവരാണ് ചിത്രത്തിന്റെ നിര്‍മ്മാണം. ടൊവിനോയും രോഹിത്തും അഖില്‍ ജോര്‍ജും 'കള'യുടെ സഹനിര്‍മ്മാതാക്കളാണ്.