മുംബയ് : അന്താരാഷ്ട്ര നാണയനിധിയുടെ ചീഫ് ഇക്കണോമിസ്റ്റായ ഗീത ഗോപിനാഥിനെക്കുറിച്ചുള്ള ബോളിവുഡ് സൂപ്പർതാരം അമിതാഭ് ബച്ചന്റെ പരാമർശത്തെ തുടർന്ന് വിവാദം. റിയാലിറ്റി ഷോ ആയ കോൻബനേഗ ക്രോർപതിയിലായിരുന്നു ഗീത ഗോപിനാഥിനെക്കുറിച്ചുള്ള ബച്ചന്റെ പരാമർശം. സ്ത്രീവിരുദ്ധ പരാമർശമാണെന്ന് ആരോപിച്ച് വൻ വിമർശനമാണ് താരത്തിന് നേരെ ഉയരുന്നത്.

ചിത്രത്തിൽ കാണുന്ന സാമ്പത്തിക വിദഗ്ദ്ധ ഏതു സംഘടനയുടെ ചീഫ് ഇക്കണോമിസ്റ്റാണെന്നതായിരുന്നു മത്സരാർത്ഥിയോടുള്ള ചോദ്യം. ഗീത ഗോപിനാഥിന്റെ ചിത്രവും നാലു ഓപ്ഷനുകളും പങ്കുവെച്ചിരുന്നു. ചിത്രം നോക്കിക്കൊണ്ട് അമിതാഭ് ബച്ചൻ പറഞ്ഞത് ഇങ്ങനെ; 'അവളുടെ മുഖം വളരെ മനോഹരമാണ്.. അതിനാൽ ഒരിക്കലും അവളെ സാമ്പത്തികരംഗവുമായി ബന്ധപ്പെടുത്തി ആരും ചിന്തിക്കില്ല'.

അമിതാഭ് ബച്ചന്റെ വാക്കുകൾ ഗീത ഗോപിനാഥ് തന്നെയാണ് സോഷ്യൽ മീഡിയയിൽ പങ്കുവെച്ചത്. ഓകെ, ഈ നിമിഷം എനിക്ക് ഒരിക്കലും മറക്കാനാവില്ല. ബിഗ് ബിയുടെ ഏറ്റവും വലിയ ആരാധിക എന്ന നിലയിൽ ഇത് എനിക്ക് എന്നും പ്രിയപ്പെട്ടതാണ് ഗീത ഗോപിനാഥ് കുറിച്ചു.

Ok, I don't think I will ever get over this. As a HUGE fan of Big B @SrBachchan, the Greatest of All Time, this is special! pic.twitter.com/bXAeijceHE

— Gita Gopinath (@GitaGopinath) January 22, 2021

എന്നാൽ ബച്ചന്റെ പരാമർശം ലിംഗ വിവേചനമാണെന്നാണ് ഉയർന്ന പ്രതികരണം. ഗീത ഗോപിനാഥ് എന്ന വ്യക്തിയുടെ നേട്ടങ്ങൾ പറയാതെ അവരുടെ മുഖത്തെ സൗന്ദര്യം നോക്കി ഇത്തരം പരാമർശങ്ങൾ നടത്തിയത് ശരിയായില്ലെന്നും ട്വിറ്റർ ഉപയോക്താക്കൾ പറഞ്ഞു. രഘുറാം രാജനോ കൗശിക് ബസുവോ ആയിരുന്നു സ്‌ക്രീനിലെങ്കിൽ ബച്ചൻ ഇത്തരം പ്രസ്താവന നടത്തുമായിരുന്നോ എന്നും ചിലർ ചൂണ്ടിക്കാട്ടി.