താൻ ആദ്യമായി നിർമ്മിക്കുന്ന ചിത്രമായ 'പത്മ'യുടെ ഫസ്റ്റ് ലുക്ക് പോസ്റ്റർ ഫേസ്ബുക്കിലൂടെ പങ്കുവച്ച് നടൻ അനൂപ് മേനോൻ. സിനിമയിലെ ടൈറ്റിൽ കഥാപാത്രമായി എത്തുന്ന നടി സുരഭി ലക്ഷ്മിയെയാണ് പോസ്റ്ററിൽ കാണുന്നത്. സൺഗ്ളാസ്‌ ധരിച്ച്, അടിപൊളി ലുക്കിലാണ് ദേശീയ അവാർഡ് ജേതാവ് കൂടിയായ സുരഭി പോസ്റ്ററിൽ പ്രത്യക്ഷപ്പെടുന്നത്.
ഒരു വലിയ നഗരത്തിന്റെ പശ്ചാത്തലത്തില്‍ നടക്കുന്ന കഥ പറയുന്ന 'പത്മ'യിലെ നായകൻ അനൂപ് മേനോന്‍ തന്നെയാണ്. ഒപ്പം കഥ, തിരക്കഥ, സംഭാഷണം, സംവിധാനം എന്നിവയും അനൂപ് കൈകാര്യം ചെയ്യുന്നു.
അനൂപ് മേനോന്‍ സ്‌റ്റോറീസിന്റെ ബാനറില്‍ നിര്‍മ്മിക്കുന്ന ഈ ചിത്രത്തില്‍ ശങ്കര്‍ രാമകൃഷ്ണന്‍, മെറീന മൈക്കിള്‍ എന്നിവരും അഭിനയിക്കുന്നു. ചിത്രത്തിൽ ഇരുപതോളം പുതുമുഖങ്ങളുമുണ്ട്. മഹാദേവന്‍ തമ്പിയാണ് ഛായാഗ്രഹണം. പ്രൊഡക്ഷന്‍ ഡിസൈനര്‍-ബാദുഷ, കല-ദുന്‍ദു രഞ്ജീവ്, എഡിറ്റര്‍-സിയാന്‍, പ്രൊഡക്ഷന്‍ കണ്‍ട്രോളര്‍-അനില്‍ ജി.