ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം ഒൻപത് കോടി തൊണ്ണൂറ്റിരണ്ട് ലക്ഷം കടന്നു. അഞ്ചര ലക്ഷത്തിലധികം പുതിയ കേസുകൾ റിപ്പോർട്ട് ചെയ്തു. വേൾഡോമീറ്ററിന്റെ കണക്കുപ്രകാരം 21,28,700 പേരാണ് വൈറസ് ബാധ മൂലം മരണമടഞ്ഞത്. രോഗമുക്തി നേടിയവരുടെ എണ്ണം ഏഴ് കോടി പതിമൂന്ന് ലക്ഷം പിന്നിട്ടു.

അമേരിക്ക,ഇന്ത്യ,ബ്രസീൽ,റഷ്യ,ബ്രിട്ടൻ എന്നീ രാജ്യങ്ങളിലാണ് ഏറ്റവും കൂടുതൽ രോഗബാധിതരുള്ളത്. രോഗികളുടെ എണ്ണത്തിലും മരണത്തിലും അമേരിക്കയാണ് ഒന്നാം സ്ഥാനത്ത്. യുഎസിൽ രോഗബാധിതരുടെ എണ്ണം രണ്ടരക്കോടി കടന്നു. ഒന്നര ലക്ഷത്തിലധികം പുതിയ കേസുകൾ റിപ്പോർട്ട് ചെയ്തു. 4.27 ലക്ഷം പേർ മരിച്ചു. ഒന്നരക്കോടി ആളുകൾ സുഖം പ്രാപിച്ചു.

രോഗബാധിതരുടെ എണ്ണത്തിൽ രണ്ടാം സ്ഥാനത്തുള്ള ഇന്ത്യയിൽ 1,06,55,435 പേർക്കാണ് രോഗം സ്ഥിരീകരിച്ചത്. നിലവിൽ 1.81 ലക്ഷം പേർ മാത്രമേ ചികിത്സയിലുള്ളു. രോഗമുക്തി നേടിയവരുടെ എണ്ണം 1,03,16,096 ആയി ഉയർന്നു. 1.53 ലക്ഷം പേർ മരിച്ചു.

ബ്രസീലിൽ എൺപത്തിയെട്ട് ലക്ഷം രോഗബാധിതരാണ് ഉള്ളത്. 2.16 ലക്ഷം പേർ മരിച്ചു. എഴുപത്തിയാറ് ലക്ഷം പേർ രോഗമുക്തി നേടി. റഷ്യയിൽ മുപ്പത്തിയാറ് ലക്ഷം രോഗബാധിതരാണ് ഉള്ളത്. ഇരുപതിനായിരത്തിലധികം പുതിയ കേസുകൾ റിപ്പോർട്ട് ചെയ്തു. ബ്രിട്ടനിലും രോഗബാധിതരുടെ എണ്ണം മുപ്പത്തിയാറ് ലക്ഷം കടന്നു. മുപ്പതിനായിരത്തിലധികം പേർക്കാണ് പുതുതായി വൈറസ് ബാധ സ്ഥിരീകരിച്ചത്. 97,329 പേർ മരിച്ചു.