ശ്രീനഗർ: കനത്ത മഞ്ഞുവീഴ്ചയെ തുടർന്ന് ആശുപത്രിയിൽ കുടുങ്ങിയ യുവതിയെയും നവജാതശിശുവിനെയും ആറു കി.മീറ്റർ ചുമന്ന് വീട്ടിലെത്തിച്ച് ഇന്ത്യൻ സൈന്യം മാതൃകയായി. തുടർച്ചയായി മഞ്ഞു വീണുകൊണ്ടിരിക്കുന്നതിനിടെയാണ് കാശ്‌മീരിലെ കുപ്‌വാരയിലെ ആശുപത്രിയിൽ നിന്നാണ് ആറ് കിലോമീറ്ററോളം അമ്മയെയും കുഞ്ഞിനെയും തോളിൽ ചുമന്ന് കാൽനടയായി സൈനികർ വീട്ടിലെത്തിച്ചത്.

മഞ്ഞുവീഴ്ചയിൽ നിന്ന് സംരക്ഷണമേകാൻ കുടകളുമേന്തി യുവതിയെയും കുഞ്ഞിനെയും തോളിൽ ചുമന്ന് സൈനികരുടെ സംഘം നടന്നു നീങ്ങുന്നതിന്റെ വീഡിയോ ചിനാർ കോർപ്സാണ് ട്വിറ്ററിൽ പങ്കുവച്ചത്. ദർദ്പുര സ്വദേശിയായ ഫാറൂഖ് ഖസാനയുടെ ഭാര്യയെയും കുഞ്ഞിനെയുമാണ് വീട്ടിലെത്തിച്ചത്.

വെള്ളിയാഴ്ചയാണ് ഫാറൂഖിന്റെ ഭാര്യ പ്രസവിച്ചത്. ശനിയാഴ്ച ഡിസ്ചാർജ് ചെയ്തതോടെ ഇവർ ആശുപത്രിയിൽ കുടുങ്ങി. തുടർന്നാണ് സൈന്യം ഇവരുടെ സഹായത്തിനെത്തിയതെന്ന് ഫാറൂഖിന്റെ ഒരു ബന്ധു പ്രതികരിച്ചു.

28 ആർ.ആർ ബറ്റാലിയൻ അംഗങ്ങൾ തന്റെ ഭാര്യയെയും കുഞ്ഞിനെയും വീട്ടിലെത്തിക്കാൻ സഹായിച്ചതായും അവരോട് ഏറെ നന്ദിയുണ്ടെന്നും ഫാറൂഖ് അറിയിച്ചു.