വാഷിംഗ്ടൺ: കാപ്പിറ്റോൾ കലാപവുമായി ബന്ധപ്പെട്ട് ഫേസ്​ബുക്കും ട്വിറ്ററുമടക്കമുള്ള സമൂഹ മാദ്ധ്യമങ്ങളെ പഴിച്ച്​ ഹാരി രാജകുമാരൻ. ഫാസ്റ്റ്​ കമ്പനിക്ക്​ നൽകിയ പ്രത്യേക അഭിമുഖത്തിൽ സംസാരിക്കുയായിരുന്നു അദ്ദേഹം. അമേരിക്കയുടെ ചരിത്രത്തിൽ വലിയ നാണക്കേടായി രേഖപ്പെടുത്തിയേക്കാവുന്ന സംഭവത്തിൽ തെറ്റായ വിവരങ്ങൾ പ്രചരിപ്പിച്ച സമൂഹമാദ്ധ്യമങ്ങൾ കലാപ ആസൂത്രണത്തിന്റെ പ്രധാന ഘടകമായി നിലകൊണ്ടെന്ന് അദ്ദേഹം ആരോപിച്ചു. ഇക്കാലത്ത്​ ഡിജിറ്റൽ ലാൻഡ്​സ്​കേപ്പ്​ തന്നെ മാറേണ്ടതുണ്ടെന്നും അദ്ദേഹം പറഞ്ഞു.

''വ്യാജ വാർത്തകൾ പ്രചരിക്കുന്നത്​ അവഗണിച്ചാൽ നൽകേണ്ടിവരുന്ന വിലയെന്താണെന്ന് നമുക്കിപ്പോൾ മനസിലായി. അമേരിക്കയിൽ അക്ഷരാർത്ഥത്തിൽ ജനാധിപത്യത്തിനെതിരെയുള്ള ആക്രമണമാണ്​ നടന്നത്​. അത്​ ആസൂത്രണം ചെയ്​തത്​ സമൂഹ മാദ്ധ്യമങ്ങളിലൂടെയും. ഇത് അക്രമാസക്തമായ ഭീകരവാദമാണ്.'' -ഹാരി പറഞ്ഞു.

സോഷ്യൽ മീഡിയ​ ഒരു ആത്യന്തിക ആധുനിക പൊതുയിടം ആണെന്നതും അവരെ ചോദ്യം ചെയ്യുന്നത്​ ആവിഷ്​കാര സ്വാതന്ത്ര്യത്തിന്​ വിരുദ്ധമാണെന്നതുമൊക്കെയുള്ള ആശയങ്ങൾ മുഴുവനായി അംഗീകരിക്കുന്ന രീതി പാടില്ല. അതേസമയം, അഭിപ്രായ സ്വാതന്ത്ര്യമാണോ അല്ലെങ്കിൽ കൂടുതൽ വിശ്വസനീയവും അനുകമ്പയുള്ളതുമായ ഡിജിറ്റൽ ലോകമാണോ വേണ്ടത്​ എന്ന ചോദ്യത്തിന്​ പ്രസക്​​തിയില്ലെന്നും അദ്ദേഹം കൂട്ടിച്ചേർത്തു.