വിവാഹേതര ബന്ധങ്ങളെ പ്രോത്സാഹിപ്പിക്കുന്ന മീറ്റ് മൈൻഡ്ഫുൾ.കോം എന്ന ഡേറ്റിംഗ് വെബ്‌സൈറ്റിൽ രജിസ്റ്റർ ചെയ്ത ഇരുപത്തിരണ്ട് ലക്ഷത്തിലധികം പേരുടെ സ്വകാര്യ വിവരങ്ങൾ പുറത്ത്. ഹാക്കർമാരാണ് 2014ൽ ആരംഭിച്ച ഈ വെബ്‌സൈറ്റിലെ വിവരങ്ങൾ ചോർത്തിയത്.

1.2 ജിബി ഡേറ്റയാണ് ഹാക്ക‌ർമാർ ചോർത്തിയിരിക്കുന്നത്.വെബ്‌സൈറ്റ് നിശ്ചലമായി. ഡേറ്റിംഗ് സൈറ്റിൽ ഉപയോക്താക്കൾ പ്രൊഫൈലുകൾ ഉണ്ടാക്കുമ്പോൾ നൽകിയ യഥാർഥ പേരുകൾ, ഇമെയിൽ ഐഡികൾ, നഗരം, സംസ്ഥാനം, ശരീര വിശദാംശങ്ങൾ, ഡേറ്റിംഗ് മുൻഗണനകൾ, വൈവാഹിക ജീവിതം, ജനനത്തീയതി, വിലാസങ്ങൾ, അക്കൗണ്ട് പാസ്‌വേഡുകൾ, ഫേസ്ബുക്ക് ഐഡികൾ തുടങ്ങിയവയാണ് ചോർന്നത്.

ഹാക്കിംഗ് ഫോറത്തിൽ ഡേറ്റിംഗ് സൈറ്റിലെ ആളുകളുടെ വിവരങ്ങൾ സൗജന്യ ഡൗൺലോഡിങ്ങിനായി ഷെയർ ചെയ്തിട്ടുണ്ട്. ഇത് ഏകദേശം1,500 ൽ കൂടുതൽ പേർ കണ്ടിട്ടുണ്ട്. ചിലർ ഡൗൺലോഡ് ചെയ്തിട്ടുമുണ്ട്. പങ്കാളികളുമായി ഉപയോക്താക്കൾ കൈമാറിയ വിവരങ്ങൾ ചോർന്നിട്ടില്ലെന്നാണ് സൂചന.