മുംബയ്: തൻെറ ചാനലുകളുടെ റേറ്റിങ്ങ്​ കൃത്രിമമായി വർദ്ധിപ്പിക്കാൻ റിപബ്ലിക് ടി.വി എഡിറ്റർ ഇൻ ചീഫ്​ അർണബ്​ ഗോസ്വാമി അഞ്ച്​ ഘട്ടങ്ങളിലായി 12,000 ഡോളറും 40 ലക്ഷം രൂപയും തന്നെന്ന്​ ബ്രോഡ്​കാസ്​റ്റ്​ ഒൗഡിയൻസ്​ റിസർച്ച്​ കൗൺസിൽ മുൻ മേധാവി പാർഥദാസ്​ ഗുപ്​ത പൊലീസിന്​ മൊഴിനൽകി. ഗുപ്​തയടക്കം മൂന്ന്​ പേർക്കെതിരെ 11 ന്​ കോടതിയിൽ സമർപ്പിച്ച അനുബന്ധ കുറ്റപത്രത്തിൽ തെളിവായി പൊലീസ്​ ഇതും നൽകിയിട്ടുണ്ട്​. 2004 മുതൽ അർണബിനെ അറിയാം. 2013 ലാണ്​ ബാർകിൽ ചേരുന്നത്​. 2017 ൽ റിപബ്ലിക്​ ടി.വി തുടങ്ങുന്നതിന്​ മുമ്പുതന്നെ അർണബ്​ തന്നെ വിവരം അറിയിക്കുകയും റേറ്റിംഗ്​ കൂട്ടാൻ സഹായിക്കണമെന്ന്​ സൂചന നൽകുകയും ചെയ്​തിരുന്നു. അദ്ദേഹം ഭാവിയിൽ തന്നെയും സഹായിക്കുമെന്ന സൂചനയും നൽകി. 2017 നും 2019 നുമിടയിൽ ഞാൻ എൻെറ സംഘത്തിനൊപ്പം ചേർന്ന്​ റിപബ്ലിക്​ ടി.വിയെ ഒന്നാമതെത്തിച്ചു. അതേസമയം, സമ്മർദം ചെലുത്തി പറയിപ്പിച്ചതാണെന്നും കോടതിയിൽ തെളിവായി പരിഗണിക്കില്ലെന്നും ഗുപ്​തയുടെ അഭിഭാഷകൻ അർജീൻ സിംഗ്​ പറഞ്ഞു.