കൊച്ചി: വീട് കുത്തിത്തുറന്ന് 127 പവൻ സ്വർണാഭരണങ്ങൾ കവരുകയും മോഷ്ടാക്കൾ തങ്ങളാണെന്ന് അറിയാതിരിക്കാൻ സംഘാംഗങ്ങളിൽ ഒരാളെ കൊലപ്പെടുത്തി കത്തിക്കുകയും ചെയ്ത കേസിൽ നാലുപേരെ അറസ്റ്റുചെയ്തു. തോപ്പുംപടി ചുള്ളിക്കൽ കൂട്ടുങ്കൽ ഡിനോയ് ക്രിസ്‌റ്റോ (24), ട്രാൻസ്‌ജെൻഡറായ മലപ്പുറം തിരൂർ തണലൂർ വിഷാറത്ത് വീട്ടിൽ വി. ഹാരീസ് എന്ന സുലു (34), എറണാകുളം കണ്ണമാലി കാട്ടിപ്പറമ്പ് പാട്ടാളത്ത് മണിലാൽ എന്ന സൂര്യ (19), പുനലൂർ വിളക്കുവട്ടം പരപ്പിൽ പ്രസാദ് (25) എന്നിവരെയാണ് എളമക്കര പൊലീസ് അറസ്റ്റുചെയ്തത്. ഈ സംഘത്തിലുണ്ടായിരുന്ന ഫോർട്ടുകൊച്ചി കഴുത്തുമുട്ട് മംഗലത്ത് ജോബിയാണ് (19) കൊല്ലപ്പെട്ടത്.

പുതുവത്സര രാത്രിയാണ് ഡിനോയിയുടെ പിതൃസഹോദരന്റെ എളമക്കരയിലുള്ള വീട്ടിൽ മോഷണം നടന്നത്. തൊട്ടടുത്തദിവസം ഡിനോയിയുടെ സഹോദരിയുടെ വിവാഹമായിരുന്നു. ഇതിനായി പിതൃസഹോദരന്റെ കുടുംബം വീട്ടിൽ എത്തിയെന്ന് നേരിൽകണ്ട് ഉറപ്പാക്കിയ ശേഷമാണ് സംഘാംഗങ്ങളുമായി മോഷണത്തിനെത്തിയത്. മോഷണമറിഞ്ഞ് പൊലീസ് വീട്ടിലെത്തിയപ്പോൾ ഡിനോയിയും അവിടെയുണ്ടായിരുന്നു. പരിശോധനയ്ക്കിടെ ഡോഗ് സ്‌ക്വാഡിലെ ഒരംഗത്തോട് പ്രതികളുടെ മണം എത്രനേരം വീട്ടിൽ നിൽക്കുമെന്ന് ഡിനോയ് തിരക്കിയിരുന്നു. ഈ വിവരം അന്വേഷണസംഘത്തിന് ലഭിച്ചതോടെ ഡിനോയ് നിരീക്ഷണത്തിലായിരുന്നു. സ്വർണാഭരങ്ങളിൽ ഭൂരിഭാഗവും പൊലീസ് കണ്ടെടുത്തു. രണ്ടരലക്ഷം രൂപയുടെ സ്വർണം മലപ്പുറത്തെ ജുവലറിയിൽ വിറ്റിരുന്നു. മിച്ചമുണ്ടായിരുന്ന ഒന്നരലക്ഷം രൂപ ഡിനോയിയിൽനിന്ന് പിടിച്ചെടുത്തു.

കേസിന്റെ അന്വേഷണത്തിനിടെയാണ് ബുധനാഴ്ച രാവിലെ എറണാകുളം പല്ലേപ്പടിയ്ക്ക് സമീപമുള്ള റെയിൽവെ ട്രാക്കിൽ കത്തിക്കരിഞ്ഞ മൃതദേഹം കണ്ടെത്തിയത്. തുടർന്ന് മോഷണക്കേസുമായി ബന്ധപ്പെട്ട് ഡിനോയിയെ ചോദ്യംചെയ്യുന്നതിനിടെ കൊലപാതകവും സമ്മതിക്കുകയായിരുന്നു. കഴിഞ്ഞദിവസം വിരലടയാളം ലഭിച്ചതോടെയാണ് വീണ്ടും ചോദ്യംചെയ്യാനായി ഡിനോയി, ജോബി എന്നിവരോട് സ്റ്റേഷനിൽ ഹാജരാകാൻ നിർദേശിച്ചത്. മോഷണസമയത്ത് ഗ്ലൗസ് ധരിച്ചിരുന്നതിനാൽ ഒരു കൂസലുമില്ലാതെ ഡിനോയി പൊലീസ് സ്‌റ്റേഷനിലെത്തി. ജോബി ഗ്ലൗസ് ധരിച്ചിരുന്നില്ല. ഒളിവിൽ പോകാൻ ഡിനോയ് നിർദേശിച്ചെങ്കിലും ജോബി കൂട്ടാക്കിയില്ല. അതോടെ പൊലീസ് പിടികൂടാതിരിക്കാൻ ജോബിയെ കൊലപ്പെടുത്തുകയായിരുന്നു.

ചൊവ്വാഴ്ച രാത്രി നഗരത്തിലെ ബാറിൽ മദ്യപിച്ചശേഷം ജോബിയെ വിജനമായ റെയിൽവെ ട്രാക്കിന് സമീപം എത്തിക്കുകയായിരുന്നു. തലയ്ക്ക് ചുറ്റികയ്ക്ക് അടിച്ചാണ് കൊലപ്പെടുത്തിയത്. അതിനശേഷം പെട്രോൾ ഒഴിച്ച് കത്തിക്കുകയായിരുന്നു. ഡിനോയിയാണ് ജോബിയെ കൊലപ്പെടുത്തിയത്. മറ്റുള്ളവരുടെ പങ്ക് വിശദമായ ചോദ്യംചെയ്യലിലേ വ്യക്തമാകുകയുള്ളവെന്ന് സിറ്റി പൊലീസ് കമ്മിഷണർ എച്ച്. നാഗരാജു പറഞ്ഞു. നിലവിൽ അസ്വഭാവിക മരണത്തിനാണ് കേസെടുത്തിരിക്കുന്നത്. കൊലപാതകം തെളിഞ്ഞതിനാൽ കോടതിയുടെ അനുമതിയോടെ പ്രതികൾക്കെതിരെ കൊലക്കുറ്റം ചുമത്തും.