നടി ആൻ അഗസ്റ്റിനും ഛായാഗ്രാഹകൻ ജോമോൻ ടി. ജോണും വേർപിരിയുന്നു. ഒരുമിച്ച് മുന്നോട്ടു പോകാൻ കഴിയാത്ത സാഹചര്യത്തിലാണ് വേർപിരിയാൻ ഇരുവരുടെയും തീരുമാനം. വിവാഹമോചനം ആവശ്യപ്പെട്ടു കൊണ്ടുള്ള ഹർജി ചേർത്തല കുടുംബകോടതിയിൽ ജോമോൻ സമർപ്പിച്ചിരുന്നു. ഹർജി പരിഗണിച്ച കോടതി ഫെബ്രുവരി 9ന് കുടുംബകോടതിയിൽ ഹാജരാകാൻ ആൻ അഗസ്റ്റിന് നോട്ടീസ് അയച്ചു. 2014ലാണ് ജോമോനും ആനും വിവാഹിതരാകുന്നത്. എത്സമ്മ എന്ന ആൺകുട്ടി എന്ന ചിത്രത്തിലൂടെയാണ് നടൻ അഗസ്റ്റിന്റെ മകളായ ആൻ സിനിമയിൽ എത്തുന്നത്.ഇതിനുശേഷം നിരവധി സിനിമകളുടെ ഭാഗമാകാൻ ആനിന് കഴിഞ്ഞു. ആർട്ടിസ്റ്റ് സിനിമയിലെ അഭിനയത്തിന് മികച്ച നടിക്കുള്ള സംസ്ഥാന പുരസ്കാരവും കരസ്ഥമാക്കി. വിവാഹശേഷം നീന, സോലോ എന്നീ രണ്ടു ചിത്രങ്ങളിലാണ് ആൻ അഭിനയിച്ചത്. ബംഗ്ളൂരുവിൽ പരസ്യ ഏജൻസി നടത്തുകയാണ് ആൻ ഇപ്പോൾ. ഇന്ത്യയിലെ തന്നെ പ്രധാന ഛായാഗ്രാഹകരിൽ ഒരാളാണ് ജോമോൻ ടി. ജോൺ. ചാപ്പാകുരിശിലൂടെയാണ് ജോമോൻ സ്വതന്ത്ര്യഛായാഗ്രാഹകനാകുന്നത്.മലയാളത്തിന് പുറമെ തമിഴ്, ഹിന്ദി സിനിമകൾക്കും കാമറ ചലപ്പിച്ചിട്ടുണ്ട്.നിർമാണരംഗത്തും സജീവമായി പ്രവർത്തിക്കുന്നു. രോഹിത് ഷെട്ടി സംവിധാനം ചെയ്യുന്ന രൺവീർസിംഗ് ചിത്രത്തിന്റെ ജോലിയിലാണ് ജോമോൻ ഇപ്പോൾ.