ഇൻഡോർ: രാജ്യത്തെ ഏറ്റവും വൃത്തിയുള‌ള നഗരം കഴിഞ്ഞ നാല് വർഷമായി മദ്ധ്യപ്രദേശിലെ ഇൻഡോറാണ്. എന്നാൽ ഈ വൃത്തിയും വെടിപ്പുമുള‌ള നഗരത്തിൽ അത്ര വെടിപ്പല്ലാത്തൊരു മോശം കാര്യം കഴിഞ്ഞ ദിവസം നടന്നു. അശരണരായ വൃദ്ധരെ നഗരസഭയുടെ മാലിന്യം കയ‌റ്റുന്ന ലോറിയിൽ കയറ്റി നഗരത്തിന് വെളിയിലെത്തിച്ച് വഴിയരികിൽ ഉപേക്ഷിച്ചു. നഗരത്തിൽ ഓരോ ഇടങ്ങളിലായി കഴിഞ്ഞിരുന്ന ഇവരെ വൃത്തിയുള‌ള നഗരമാക്കി മാ‌റ്റുന്നതിനാണ് ജീവനക്കാർ പുറത്തുകൊണ്ടുപോയി ഉപേക്ഷിച്ചത്.

In India's cleanest city team of Indore Municipal Corporation dumped aged destitutes on outskirts, later when villagers opposed lugged them back on truck, 2 officials suspended one transferred @ndtv @soniandtv @Suparna_Singh @manishndtv @vinodkapri @rohini_sgh @GargiRawat pic.twitter.com/mLAWc0Pdcd

— Anurag Dwary (@Anurag_Dwary) January 29, 2021

സംഭവം ശ്രദ്ധയിൽപെട്ട സ്ഥലത്തെ ഗ്രാമവാസികൾ ഒത്തുകൂടി പ്രതിഷേധിക്കുകയും ഇവരെ ഉപേക്ഷിക്കാൻ ശ്രമിക്കുന്നത് വീഡിയോ പകർത്തി സമൂഹമാദ്ധ്യമങ്ങളിൽ പ്രചരിപ്പിക്കുകയും ചെയ്‌തതോടെ ഇവരുമായി ലോറി തിരികെ പോയി. കൊടുംതണുപ്പിൽ വൃദ്ധരെ ഉപേക്ഷിച്ചാൽ ജീവൻ നഷ്‌ടമാകുമെന്ന് ഉറപ്പാണെന്ന് പ്രതിഷേധിച്ച നാട്ടുകാർ അറിയിച്ചതോടെ നിവൃത്തിയില്ലാതെയാണ് അധികൃതർ വൃദ്ധരെ തിരികെ കൊണ്ടുപോയത്.

ഒരു വൃദ്ധയെ ലോറിയിൽ നിന്നും പുറത്തിറക്കാൻ ശ്രമിക്കുന്നത് നാട്ടുകാർ തടയുന്നതാണ് വൈറലായ വീഡിയോയിലുള‌ളത്. മുനിസിപ്പൽ ജീവനക്കാരുമായി തുടർന്ന് നാട്ടുകാർ തർക്കിക്കുകയാണ്. എന്നാൽ ഇവരെ ഉപേക്ഷിക്കുന്നതല്ലെന്നും വീടില്ലാത്ത വൃദ്ധരെ രാത്രി രക്ഷാകേന്ദ്രത്തിൽ എത്തിക്കുകയായിരുന്നു നഗരസഭാ ജീവനക്കാരെന്ന് ഇൻഡോർ മുനിസിപ്പൽ കോർപറേഷൻ അഡീഷണൽ കമ്മീഷണർ അഭയ് രജൻഗാവോങ്കർ അഭിപ്രായപ്പെട്ടു. സംഭവത്തിൽ അന്വേഷണം നടത്താനും വീഡിയോയിൽ കാണുന്ന ഉദ്യോഗസ്ഥനെ സസ്‌പെൻഡ് ചെയ്യാനും മുഖ്യമന്ത്രി ശിവരാജ് സിംഗ് ചൗഹാൻ ഉത്തരവിട്ടു.