കന്യാകുമാരി: സ്ത്രീകളുടെ ടോയ്‌ലെറ്റിൽ സിസി ടിവി കാമറ സ്ഥാപിച്ചെന്ന പരാതിയിൽ സ്ഥാപന ഉടമ അറസ്റ്റിൽ. നാഗർകോവിൽ പള്ളിവിലായ് സ്വദേശിയും ഇസഡ്ത്രീ ഇൻഫോടെക് എന്ന വെബ് ഡിസൈനിംഗ് സ്ഥാപന ഉടമയുമായ എസ്. സഞ്ജുവാണ് അറസ്റ്റിലായത്. ഇയാളുടെ നാഗർകോവിൽ ചെട്ടിക്കുളത്തെ ഓഫീസിലെ ജീവനക്കാരി നൽകിയ പരാതിയിലാണ് നടപടി.
എം.ബി.എ, എൻജിനീയറിംഗ് ബിരുദധാരികളായ മൂന്ന് യുവതികളാണ് മാസം 5000 രൂപ ശമ്പളത്തിൽ ചെട്ടിക്കുളത്തെ ഓഫീസിൽ ജോലിചെയ്തിരുന്നത്. ഒന്നരമാസം മുമ്പാണ് ഇവിടെ സ്ഥാപനം പ്രവർത്തനമാരംഭിച്ചത്. കഴിഞ്ഞദിവസം ഒരു ജീവനക്കാരി ടോയ്‌ലെറ്റിലെത്തിയപ്പോഴാണ് ചുമരിലെ വിടവിനുള്ളിൽ ഒരു കവർ കണ്ടത്. തുടർന്ന് പരിശോധിച്ചപ്പോൾ സി.സി ടിവി കാമറ കണ്ടെത്തിയത്.
കേസിൽ സി.സി ടിവി കാമറയും പ്രതിയുടെ മൊബൈൽഫോണും ലാപ്‌ടോപ്പും പിടിച്ചെടുത്തതായി പൊലീസ് പറഞ്ഞു. പ്രാഥമിക പരിശോധനയിൽ ടോയ്‌ലെറ്റിൽ നിന്നുള്ള വീഡിയോകളൊന്നും കണ്ടെത്താനായില്ലെന്നും പിടിച്ചെടുത്ത കാമറയും ഫോണും ലാപ്‌ടോപ്പും വിശദ പരിശോധനയ്ക്കായി സൈബർ ക്രൈം സെല്ലിലേക്ക് അയച്ചതായും പൊലീസ് അറിയിച്ചു. അറസ്റ്റ് ചെയ്ത പ്രതിയെ കോടതിയിൽ ഹാജരാക്കി ജുഡീഷ്യൽ കസ്റ്റഡിയിൽ റിമാൻഡ് ചെയ്തു.