ലണ്ടൻ : യുകെയിൽ മലയാളി യുവാവിനെതിരെ വംശീയ അധിക്ഷേപം. കണ്ണൂർ ഇരിട്ടി സ്വദേശി ജിൻസൻ ഇരിട്ടിയാണ് കഴിഞ്ഞ രാത്രി ജോലി കഴിഞ്ഞു ബസിൽ മടങ്ങുമ്പോൾ ആക്രമിക്കപ്പെട്ടത്. 12 വർഷമായി യുകെയിൽ ആരോഗ്യ പ്രവർത്തകനായി ജോലി ചെയ്യുന്ന ജിൻസൺ സൈക്യാട്രിക് നഴ്സിങ്ങിൽ ഡണ്ടി യൂണിവേഴ്സിറ്റിയിൽ ഉന്നതപഠനം നടത്തുന്നുമുണ്ട്. ബസിൽ ജിൻസനെ കൂടാതെ യാത്ര ചെയ്തിരുന്ന മറ്റൊരു യാത്രക്കാരനാണ് വംശീയാധിക്ഷേപം നടത്തുകയും അസഭ്യം പറയുകയും അക്രമത്തിന് മുതിരുകയും ചെയ്തത്. ഡ്രൈവർ ഇടപെട്ട് ഇയാളെ ശാന്തനാക്കാൻ ശ്രമിച്ചെങ്കിലും ഫലമുണ്ടായില്ല. ഉടൻ തന്നെ പൊലീസിൽ വിവരമറിയിച്ചതിനെത്തുടർന്ന് പൊലീസ് സംഭവ സ്ഥലത്തെത്തുകയും ഇയാളെ അറസ്റ്റ് ചെയ്യുകയും ചെയ്തു.

‌