മലപ്പുറം: ജില്ലയിൽ ഇന്നലെ 580 പേർക്ക് കൊവിഡ് സ്ഥിരീകരിച്ചു. ഇതിൽ 547 പേർക്കും നേരിട്ടുള്ള സമ്പർക്കത്തിലൂടെയാണ് വൈറസ് ബാധയുണ്ടായത്. നേരിട്ടുള്ള സമ്പർക്കത്തിലൂടെ രോഗബാധിതരാകുന്നവർ വർദ്ധിക്കുന്ന സ്ഥിതി തുടരുന്നത് ആശങ്കാജനകമാണെന്നും ഈ സാഹചര്യത്തിൽ കൊവിഡ് ജാഗ്രതാ നിർദ്ദേശങ്ങൾ എല്ലാവരും കർശനമായി പാലിക്കണമെന്നും ജില്ലാ മെഡിക്കൽ ഓഫീസർ അറിയിച്ചു. ആരോഗ്യമേഖലയിൽ പ്രവർത്തിക്കുന്ന ഒരാളും ഉറവിടമറിയാതെ 26 പേരും ഇന്നലെ രോഗബാധിതരായവരിൽ ഉൾപ്പെടുന്നു. രോഗം സ്ഥിരീകരിച്ചവരിൽ അഞ്ചുപേർ വിവിധ വിദേശ രാജ്യങ്ങളിൽ നിന്നും ഒരാൾ ഇതര സംസ്ഥാനത്ത് നിന്നും ജില്ലയിലെത്തിയതാണ്.

വിദഗ്ദ്ധ ചികിത്സയ്ക്ക് ശേഷം 457 പേരാണ് ജില്ലയിൽ ശനിയാഴ്ച രോഗ വിമുക്തരായത്.