പാലക്കാട്: കൊവിഡ് വാക്സിൻ കുത്തിവെപ്പിനുള്ള തയ്യാറെടുപ്പുകളുടെ ഭാഗമായി ജില്ലയിൽ ഇന്ന് മൂന്നിടത്ത് ഡ്രൈ റൺ നടക്കും. ജില്ലാ ആശുപത്രി, ഒറ്റപ്പാലം വള്ളുവനാട് ആശുപത്രി, ഡയാറ സ്ട്രീറ്റ് അർബൻ പി.എച്ച്.സിയുടെ ഔട്ട് റീച്ച് ഇമ്മ്യൂണൈസേഷൻ സെന്ററായ പാലക്കാട് കൊപ്പം എൽ.പി.എസ് എന്നിവിടങ്ങളിലാണിത്.

മെഡിക്കൽ കോളേജ്/ ജില്ലാശുപത്രി, സ്വകാര്യ ആശുപത്രി, നഗര ആരോഗ്യ കേന്ദ്രം എന്നിവിടങ്ങളിൽ വാക്സിൻ വിതരണം വിജയകരമാകുമോയെന്ന് പരിശോധിക്കുന്നതിനാണ് ഈ കേന്ദ്രങ്ങൾ തിരഞ്ഞെടുത്തത്.

രാവിലെ 9 മുതൽ 11 വരെയാണ് ഡ്രൈ റൺ. ഓരോ കേന്ദ്രങ്ങളിലും 25 ആരോഗ്യ പ്രവർത്തകർ വീതം 75 പേർ പങ്കെടുക്കും. നേരത്തെ രജിസ്റ്റർ ചെയ്തിട്ടുണ്ടോയെന്ന് ഉൾപ്പെടെയുള്ള നടപടിക്രമം പാലിച്ചാണ് പരിപാടി. കുത്തിവെപ്പിനായി ഒരുക്കിയിട്ടുള്ള ക്രമീകരണം വിലയിരുത്തുക, 25 പേർക്ക് രണ്ട് മണിക്കൂറിനുള്ളിൽ കുത്തിവെപ്പ് നൽകാനാകുമോയെന്ന് പരിശോധിക്കുക, കൊവീൻ അപ്ലിക്കേഷൻ പ്രവർത്തനം വിലയിരുത്തുക എന്നിവയും ഇതിനോടനുബന്ധിച്ച് നടക്കും.

ജനുവരി രണ്ടിന് നെന്മാറ സാമൂഹികാരോഗ്യ കേന്ദ്രത്തിൽ നടത്തിയ ആദ്യ ഡ്രൈ റൺ വിജയകരമായിരുന്നു. ഒരു വാക്സിനേറ്റർ ഓഫീസറും നാല് വാക്സിനേഷൻ ഓഫീസർമാരും അടങ്ങുന്ന സംഘത്തെയാണ് ഒരു കേന്ദ്രത്തിൽ സജ്ജമാക്കിയത്. കൊവിഡ് മാനദണ്ഡം പാലിച്ചുള്ള വെയിറ്റിംഗ് ഏരിയ, തിരിച്ചറിയൽ പരിശോധന, വാക്സിനേഷൻ, നിരീക്ഷണം എന്നീ സജ്ജീകരണങ്ങളോടെയാണ് ആദ്യ ഡ്രൈ റൺ നടന്നത്.