പത്തനംതിട്ട : പുതുവർഷത്തിന്റെ പൊൻകിരണങ്ങളുടെ ശോഭയിൽ ശബരീശനെ കണ്ടു വണങ്ങി ഭക്തർ. മുൻവർഷങ്ങളിൽ പുതുവർഷത്തിൽ സന്നിധാനത്ത് ആഭൂതപൂർവമായ ഭക്തജനത്തിരക്കാണ് ഉണ്ടാകാറുള്ളത്. കൊവിഡ് പശ്ചാത്തലത്തിൽ നിയന്ത്രണങ്ങൾ ഉള്ളതിനാൽ ഇക്കുറി ഒരു ദിവസം അയ്യായിരം പേർക്ക് മാത്രമാണ് ദർശനം. 48 മണിക്കൂറിനുള്ളിൽ പരിശോധിച്ച ആർറ്റിപിസിആർ/ ആർറ്റിലാംബ് / എക്‌സ്പ്രസ്‌നാറ്റ് കൊവിഡ് നെഗറ്റീവ് സർട്ടിഫിക്കറ്റ് ഉള്ളവരെ മാത്രമാണ് ദർശനത്തിന് അനുവദിച്ചിട്ടുള്ളത്.
പുതുവത്സരത്തെ വരവേറ്റ് സന്നിധാനത്ത് ഡ്യൂട്ടിയിലുള്ള പൊലീസ് അയ്യപ്പൻമാർ കർപ്പൂരദീപം തെളിച്ചു. ശബരിമല എക്‌സിക്യൂട്ടിവ് ഓഫീസർ വി.എസ്. രാജേന്ദ്രപ്രസാദിന്റെ സാന്നിധ്യത്തിൽ സന്നിധാനം പൊലീസ് അസി. സ്‌പെഷ്യൽ ഓഫീസർ പദം സിങ്ങ് വെൽക്കം 2021 എന്നു കർപ്പൂരം കൊണ്ട് എഴുതിയതിലേക്ക് ജ്വാല പകർന്നു.
ഭക്തർക്ക് നവവത്സരാശംസകൾ നേർന്ന് തന്ത്രി
ശബരിമല തന്ത്രി കണ്ഠരര് രാജീവര് ഭക്തർക്ക് നവവത്സരാശംസകൾ നേർന്നു. പുതിയ വർഷം കൊവിഡ് മാറി ഐശ്വര്യ സമ്പൂർണമാകട്ടെ എന്ന് പ്രാർത്ഥിക്കുന്നു എന്നും ശബരിമലയിൽ ദർശനത്തിനെത്തുന്ന എല്ലാ ഭക്തരും കൊവിഡ് മാനദണ്ഡങ്ങൾ കൃത്യമായും പാലിക്കണമെന്നും അദ്ദേഹം പറഞ്ഞു