കോന്നി: തദ്ദേശീയമായി മത്സ്യക്കൃഷി നടത്തി വിൽപന നടത്തുന്ന
'കോന്നി ഫിഷ്' പദ്ധതി ഫെബ്രുവരി ആദ്യ ആഴ്ചയിൽ കോന്നിയിൽ ആരംഭിക്കും. നിയോജക മണ്ഡലത്തിലെ ഡാമുകളുടെ ജലസംഭരണികൾ ഉപയോഗപ്പെടുത്തി ഫിഷറീസ് ഡിപ്പാർട്ട്‌മെന്റിന്റെ ഭാഗമായി പ്രവർത്തിക്കുന്ന ജലകൃഷി വികസന ഏജൻസി (അഡാക്) വഴിയാണ് പദ്ധതി നടപ്പിലാക്കുന്നത്. ആദ്യ ഘട്ടമായി കക്കി ഡാമിന്റെ ജലസംഭരണിയിലാണ് പദ്ധതി നടപ്പിലാക്കുന്നത്. പട്ടികവർഗ് വിഭാഗത്തിൽപ്പെട്ട 100 പേർക്ക് ഇതിലൂടെ തൊഴിൽ ലഭ്യമാക്കാൻ കഴിയുമെന്നാണ് പ്രതീക്ഷ.
ഡാമുകളിൽ കൂട് സ്ഥാപിക്കും
ഡാമിന്റെ ജലസംഭരണിയിൽ സ്ഥാപിക്കുന്ന കൂടുകളിൽ മത്സ്യ കുഞ്ഞുങ്ങളെ നിക്ഷേപിച്ച് വളർത്തിയെടുക്കുന്ന കേജ് ഫാമിംഗ് സമ്പ്രദായത്തിലൂടെയാണ് മത്സ്യോത്പാദനം നടത്തുന്നത്. കക്കി ജലസംഭരണിയിൽ 100 കൂടുകൾ സ്ഥാപിക്കും. 6 മീറ്റർനീളവും വീതിയുമുള്ള കൂടിന് 4 മീറ്റർ താഴ്ച ഉണ്ടാകും..കൂട് ജലസംഭരണിയിൽ നിക്ഷേപിച്ചാൽ ജലോപരിതലത്തിൽ തന്നെ നിൽക്കുന്ന നിലയിലാണ് രൂപകല്പന ചെയ്തിട്ടുള്ളത്. ഒരു കൂട്ടിൽ 3000 മത്സ്യ കുഞ്ഞുങ്ങളെയാകും നിക്ഷേപിക്കുക. ഒരു വർഷത്തിൽ 2 തവണ കൃഷി നടത്തി വിളവെടുപ്പു നടത്തും. തദ്ദേശീയ മത്സ്യങ്ങളെയാകും കൃഷി ചെയ്യുക.
100 പേർക്ക് തൊഴിൽ
പട്ടികവർഗ വിഭാഗത്തിൽ പെടുന്ന 100 ഗുണഭോക്താക്കളെ സീതത്തോട് ഗ്രാമപഞ്ചായത്തും, വനം വകുപ്പും ചേർന്ന് കണ്ടെത്തും. പദ്ധതി നടപ്പിലാക്കുന്നതിന്റെ പൂർണ ചെലവ് ഫിഷറീസ് ഡിപ്പാർട്ട്‌മെന്റ് വഹിക്കും.കൃഷിയിൽ ഏർപ്പെടുന്ന ഘട്ടത്തിൽ പരിപാലനത്തിൽ ഏർപ്പെടുന്ന ഗുണഭോക്താക്കൾക്ക് പ്രതിദിനം 400 രൂപ വീതം വേതനവും ലഭിക്കും. മത്സ്യകൃഷിയിലൂടെയുള്ള ലാഭവും ഗുണഭോക്താക്കൾക്കായിരിക്കും ലഭിക്കുക. ഡാമിലെ കൃഷിയിലൂടെ ലഭിക്കുന്ന മത്സ്യം മത്സ്യഫെഡ് ഏറ്റെടുത്ത് വിപണനം നടത്തും.ഇതിനായി മത്സ്യഫെഡ് സീതത്തോട്, കോന്നി, കലഞ്ഞൂർ എന്നിവിടങ്ങളിൽ കോന്നി ഫിഷ് വില്പന കേന്ദ്രങ്ങൾ ആരംഭിക്കും. ഡാമുകളിൽ ഇപ്പോൾ നടക്കുന്ന മത്സ്യ ബന്ധനത്തിലൂടെ ശേഖരിക്കുന്ന മത്സ്യവും കോന്നി ഫിഷ് സ്റ്റാളുകളിൽ ലഭിക്കും.ആദ്യ ഘട്ടമായി കക്കി ഡാമിൽ നടത്തുന്ന മത്സ്യകൃഷി തുടർന്ന് മണ്ഡലത്തിലെ ഇതര ഡാമുകളിലും വ്യാപിപ്പിക്കും. പദ്ധതി നടത്തിപ്പിനായി എം.എൽ.എ ചെയർമാനായി ഫിഷറീസ്, പഞ്ചായത്ത്, വനം, കെ.എസ്.ഇ.ബി, ഡാം സേ്റ്റഫി വിഭാഗങ്ങൾ ഉൾപ്പെടുന്ന മോണിട്ടറിംഗ് സമിതി രൂപീകരിച്ചു.
--------------
ആദ്യഘട്ട കൃഷിയിൽ തന്നെ 125 ടൺ മത്സ്യം ലഭിക്കുമെന്നാണ് പ്രതീക്ഷ. ഡാം റിസർവോയറുകളിൽ കേജ് ഫാമിംഗിംഗ്ന് അനന്തസാദ്ധ്യതകളാണുള്ളത്. കോന്നി ഫിഷ് എന്ന ബ്രാൻഡിംഗിൽ നമ്മുടെ തനത് മത്സ്യം ആദ്യം നിയോജക മണ്ഡലത്തിലും, പിന്നീട് ജില്ല മുഴുവനും എത്തിച്ചു വില്പന നടത്തും.
കെ.യു. ജനീഷ് കുമാർ എം.എൽ.എ