തിരുവല്ല: സേവനപ്രവർത്തനം തന്നെയാണ് ആധ്യാത്മികതയെന്ന് ശ്രീരാമകൃഷ്ണാശ്രമം തെളിച്ചതായി മലങ്കര കത്തോലിക്കാ സഭ തിരുവല്ല അതിരൂപത ആർച്ച് ബിഷപ്പ് തോമസ് മാർ കൂറിലോസ് പറഞ്ഞു. തിരുവല്ല മതിൽഭാഗത്ത് ശ്രീരാമകൃഷ്ണാശ്രമം ചാരിറ്റബിൾ ഡിസ്‌പെൻസറിയുടെ വിപുലീകരിച്ച മെഡിക്കർ ലാബ് ഉദ്ഘാടന ചടങ്ങിൽ മുഖ്യപ്രഭാഷണം നടത്തുകയായിരുന്നു അദ്ദേഹം. കൊച്ചി കപ്പൽശാല അസിസ്റ്റന്റ് ജനറൽ മാനേജർ പി.എൻ. സമ്പത്ത് കുമാർ ലാബിന്റെ ഉദ്ഘാടനം നിർവഹിച്ചു.തിരുവല്ല ശ്രീരാമകൃഷ്ണാശ്രമം മഠാധിപതി സ്വാമി നിർവിണാനന്ദ അദ്ധ്യക്ഷനായി. സ്വാമി കൃഷ്ണാനന്ദ തീർത്ഥപാദർ, തിരുവല്ല നഗരസഭാ ചെയർപേഴ്‌സൺ ബിന്ദു ജയകുമാർ, വാർഡ് മെമ്പർ മിനിപ്രസാദ്, പുഷ്പഗിരി ആശുപത്രി സി.ഇ.ഒ. ഫാ.ജോസ് കല്ലുമാലിയ്ക്കൽ, രാധാകൃഷ്ണൻ വേണാട്ട്, അഡ്വ. പി. ഹരികൃഷ്ണൻ, ഡോ.ജോ ഏബ്രഹാം തുടങ്ങിയവർ പ്രസംഗിച്ചു. കൊച്ചി കപ്പൽശാലയുടെ സഹായത്തോടെ മതിൽഭാഗം ഗോവിന്ദൻകുളങ്ങര ക്ഷേത്രത്തിന് സമീപം ആരംഭിക്കുന്ന ലാബിൽ എല്ലാ മെഡിക്കൽ ടെസ്റ്റുകളും ഇ.സി.ജിയും സൗജന്യ നിരക്കിലാണ്. പുഷ്പഗിരി മെഡിക്കൽ കോളേജ് ഡിപ്പാർട്ട്‌മെന്റ് ഓഫ് കമ്യൂണിറ്റി മെഡിസിൻ സ്‌പെഷ്യലിസ്റ്റ് ഡോക്ടർമാർ, ന്യൂറോ, ഇ.എൻ.ടി. എന്നിവരുടെ സേവനം ലഭ്യമാണ്.