പത്തനംതിട്ട: ജില്ലയിലേക്കുള്ള കൊവിഡ് പ്രതിരോധ വാക്സിൻ ഇന്ന് പത്തനംതിട്ട ജനറൽ ആശുപത്രിയിൽ എത്തും. തിരുവനന്തപുരത്ത് നിന്ന് പുറപ്പെടുന്ന കൊവിഡ് വാക്സിൻ വാൻ ഉച്ചയോടെ പത്തനംതിട്ടയിലെത്തും. ശീതീകരിച്ച വാനിൽ വലിയ പെട്ടികളിലാണ് വാക്സിൻ സൂക്ഷിച്ചിരിക്കുന്നത്. ഇവിടെ നിന്ന് ജില്ലയിലെ വിതരണ കേന്ദ്രങ്ങളിലേക്ക് പ്രത്യേക വാഹനത്തിൽ കൊണ്ടുപോകും.
ആദ്യഘട്ടത്തിൽ 21000 ആളുകൾക്കുള്ള വാക്സിനാണ് എത്തുന്നത്. ഇരുപതിനായിരത്തോളം ആരോഗ്യ പ്രവർത്തകരും കൊവിഡ് പ്രതിരോധ പോരാളികളുമാണ് വാക്സിൻ സ്വീകരിക്കുന്നത്.
16ന് ജില്ലയിൽ ഒൻപത് കേന്ദ്രങ്ങളിൽ വാക്സിൻ വിതരണം ചെയ്യും. മുൻകൂട്ടി രജിസ്റ്റർ ചെയ്ത ആരോഗ്യ പ്രവർത്തകർക്കാണ് ആദ്യം വാക്സിൻ നൽകുന്നത്.
പത്തനംതിട്ട ജനറൽ ആശുപത്രി, അടൂർ ജനറൽ ആശുപത്രി, കോഴഞ്ചേരി ജില്ലാ ആശുപത്രി, തിരുവല്ല താലൂക്ക് ആശുപത്രി, കോന്നി താലൂക്ക് ആശുപത്രി, റാന്നി താലൂക്ക് ആശുപത്രി, അയിരൂർ ആയുർവേദ ജില്ലാ ആശുപത്രി, കൊറ്റനാട് ഹോമിയോ ജില്ലാ ആശുപത്രി, തിരുവല്ല ബിലീവേഴ്‌സ് ചർച്ച് മെഡിക്കൽ കോളേജ് എന്നിവയാണ് വാക്സിൻ വിതരണ കേന്ദ്രങ്ങൾ. ഒരു കേന്ദ്രത്തിൽ ഒരു ദിവസം പരമാവധി 100 പേർക്കാണ് വാക്സിൻ നൽകുന്നത്. ഗവൺമെന്റ്, ആയുഷ്, സ്വകാര്യ മേഖലകളിലെ വിതരണ കേന്ദ്രങ്ങൾ പൂർണ സജ്ജമായി.
.