പത്തനംതിട്ട : കേരളത്തിൽ നടക്കുന്ന പൊതു വികസനത്തിനപ്പുറമുള്ള എടുത്തുപറയത്തക്ക വികസന മുന്നേറ്റമാണ് കോന്നി നിയോജക മണ്ഡലത്തിൽ കഴിഞ്ഞ ഒന്നര വർഷമായി നടക്കുന്നതെന്ന് വനം മന്ത്രി അഡ്വ.കെ.രാജു പറഞ്ഞു. കലഞ്ഞൂർ വാഴപ്പാറയിൽ സോഷ്യൽ ഫോറസ്ട്രി വിഭാഗത്തിന്റെ ജില്ലാ സ്ഥിരം നഴ്സറിയുടെ നിർമാണ ഉദ്ഘാടനം നിർവഹിക്കുകയായിരുന്നു മന്ത്രി. കോന്നി ആനക്കൂട്ടിൽ ആന മ്യൂസിയം നവീകരിച്ച് നിർമിച്ചതും, അടവിയുടെ നവീകരണ പ്രവർത്തനങ്ങൾ നടത്തിയതും ഇക്കാലയളവിലാണ്.
ജില്ലാ സ്ഥിരം നഴ്സറിയ്ക്ക് ആകർഷകമായതും, റോഡ്, ജലം ഉൾപ്പടെ എല്ലാ വിധ സൗകര്യങ്ങളുമുള്ള സ്ഥലം തന്നെയാണ് കണ്ടെത്തിയത്. നിരവധി ആളുകൾക്ക് പ്രാദേശികമായി തൊഴിൽ സൗകര്യം ലഭിക്കാനും ഈ പദ്ധതി ഉപകരിക്കും. കോന്നി ആനക്കൂട്ടിലേയ്ക്ക് ഒന്നിൽ കൂടുതൽ ആനയെ വേണമെന്ന് എം.എൽ.എ നിർബന്ധം പിടിക്കുകയാണ്. ഈ ആവശ്യവും വകുപ്പിന്റെ അടിയന്തിര പരിഗണനയിലാണ് എന്നും മന്ത്രി പറഞ്ഞു.
അഡ്വ. കെ.യു ജനീഷ്‌കുമാർ എം.എൽ.എ അധ്യക്ഷത വഹിച്ചു. പ്രിൻസിപ്പൽ ചീഫ് ഫോറസ്റ്റ് കൺസർവേറ്റർ ഡി.കെ.വർമ്മ, സോഷ്യൽ ഫോറസ്ട്രി അഡീഷണൽ പ്രിൻസിപ്പൽ ചീഫ് കൺസർവേറ്റർ ഇ.പ്രദീപ് കുമാർ, പറക്കോട് ബ്ലോക്ക് പഞ്ചായത്ത് പ്രസിഡന്റ് ആർ.തുളസീധരൻ പിള്ള, കലഞ്ഞൂർ ഗ്രാമപഞ്ചായത്ത് പ്രസിഡന്റ് പുഷ്പവല്ലി , ജില്ലാ പഞ്ചായത്ത് അംഗം അജോമോൻ, ദക്ഷിണ മേഖല സോഷ്യൽ ഫോറസ്ട്രി കൺസർവേറ്റർ ഐ. സിദ്ദിഖ്, കോന്നി ഡിവിഷണൽ ഫോറസ്റ്റ് ഓഫീസർ കെ.എൻ. ശ്യാം മോഹൻലാൽ, റാന്നി ഡിവിഷണൽ ഫോറസ്റ്റ് ഓഫീസർ പി.കെ. ജയകുമാർ ശർമ, ബ്ലോക്ക് പഞ്ചായത്ത് വൈസ് പ്രസിഡന്റ് എം.പി. മണിയമ്മ, കലഞ്ഞൂർ ഗ്രാമ പഞ്ചായത്ത് വൈസ് പ്രസിഡന്റ് മിനി എബ്രഹാം, പറക്കോട് ബ്ലോക്ക് പഞ്ചായത്ത് അംഗം പി.വി. ജയകുമാർ, കലഞ്ഞൂർ ഗ്രാമപഞ്ചായത്ത് അംഗം കെ.സോമൻ തുടങ്ങിയവർ പങ്കെടുത്തു.