ചെങ്ങന്നൂർ: ചെങ്ങന്നൂർ - മാവേലിക്കര മണ്ഡലങ്ങളെ തമ്മിൽ ബന്ധിപ്പിക്കുന്ന ചുക്കുളത്ത്കടവ് പാലത്തിനുള്ള സ്ഥലമേറ്റെടുപ്പ് നടപടികൾ പുരോഗമിക്കുന്നു. തഴക്കര, വെണ്മണി പഞ്ചായത്തുകളെ ബന്ധിപ്പിച്ച് അച്ചൻകോവിലാറിന് കുറുകെയാണ് പാലം നിർമ്മിക്കുന്നത്. പാലം വരുന്നതോടെ ഈ പ്രദേശങ്ങളിലെ ജനങ്ങളുടെ യാത്രക്ളേശത്തിന് പരിഹാരമാകും. 15.84 കോടി രൂപ വകയിരുത്തിയാണ് പാലം നിർമ്മിക്കുന്നത്. 26 മീറ്റർ നീളമുള്ള മൂന്ന് സ്പാനുകളും 12.5 മീറ്റർ വീതം നീളമുള്ള 11 സ്പാനുകളും ഉണ്ടാകും. 215 മീറ്ററാണ് പാലത്തിന്റെ നീളം. 7.50 മീറ്റർ വീതിയുള്ള ക്യാരേജ് വേയും, 1.50 മീറ്റർ വീതിയിൽ നടപ്പാതയും ഉൾപ്പെടെ 9.70 മീറ്ററാണ് വീതി.