കോഴഞ്ചേരി: ഓട്ടോയും ബൈക്കും കൂട്ടിയിടിച്ചുണ്ടായ അപകടത്തിൽ അഞ്ച് പേർക്ക് പരിക്ക്. ഇന്നലെ രാവിലെ 8ന് ചെങ്ങന്നൂർ കോഴഞ്ചേരി റോഡിൽ ആറാട്ടുപുഴ ജംക്ഷന് സമീപമായിരുന്നു അപകടം. ചെങ്ങന്നൂർ ഭാഗത്ത് നിന്ന് അമിത വേഗത്തിൽ വന്ന ബൈക്ക് ചെങ്ങന്നൂർ ഭാഗത്തേക്ക് പോയ ഓട്ടോയിൽ ഇടിച്ച് കയറുകയായിരുന്നു. ബൈക്ക് ഓടിച്ച കാരയ്ക്കാട് മേലേത്തിൽ ആദർശ് ബാബു(20) , പിന്നിൽ ഉണ്ടായിരുന്ന ചെങ്ങന്നൂർ മോടിയിൽ മനീഷ്(22), ഓട്ടോ ഡ്രൈവർ ഇടശേരിമല സ്വദേശി ശ്രീനാഥ്, ഓട്ടോ യാത്രികരായ ആറന്മുള പള്ളിമുക്കം സ്വദേശിനി അർച്ചന, നടരാജൻ എന്നിവരെ മാലക്കരയിലെ സ്വകാര്യ ആശുപത്രിയിൽ പ്രവേശിപ്പിച്ചു. ഗുരുതരമായി പരുക്കേറ്റ മനീഷിനെ ചങ്ങനാശേരിയിലെ സ്വകാര്യാശുപത്രിയിലേക്ക് മാറ്റി. ആറന്മുള പൊലീസ് കേസെടുത്തു.