കരുനാഗപ്പള്ളി: അയണിവേലിക്കുളങ്ങര ജോൺ എഫ് കെന്നഡി മെമ്മോറിയൽ സ്കൂളിൽ കുട്ടികൾക്കായി പണികഴിപ്പിച്ച സംസ്കാര അമിനിറ്റി സെന്റർ ആൻഡ് സ്പോർട്സ് ഹബ് എ .എം .ആരിഫ് എം.പി ഉദ്ഘാടനം ചെയ്തു. ഇൻഡോർ ബാഡ്മിന്റെൺ കോർട്ട് ഉൾപ്പടെ വിവിധോദ്ദേശ പരിപാടികൾ നടത്താൻ ഉതകുന്ന രീതിയിലാണ് അമിനിറ്റി സെന്റർ നിർമ്മിച്ചിരിക്കുന്നത്. പി.ടി. എ പ്രസിഡന്റ് ലാൽജി പ്രസാദ് അദ്ധ്യക്ഷത വഹിച്ചു. ചടങ്ങിൽ ആർ. രാമചന്ദ്രൻ എം.എൽ.എ സ്കൂൾ സ്ഥാപക മാനേജറായ കാരാഞ്ചേരി രാമകൃഷ്ണപിള്ളയുടെയും സരോജിനി പിള്ളയുടെയും ഫോട്ടോ അനാശ്ചാദനം ചെയ്യുകയും പ്രതിഭകളെ ആദരിക്കുകയും പരിസ്ഥിതി ക്ലബും പി .ടി .എ യും ചേർന്നുള്ള കരനെൽകൃഷിയിലൂടെ വിളവെടുത്ത കുത്തരി കെന്നഡി റൈസ് എന്ന പേരിൽ കൗൺസിലർ സുഷ അലക്സിന് നൽകി ഉദ്ഘാടനം നിർവഹിക്കുകയും ചെയ്തു. മുനിസിപ്പൽ ചെയർമാൻ കോട്ടയിൽ രാജു, പ്രിൻസിപ്പൽ എം .എസ്.ഷിബു , എച്ച്. എം. മുർഷിദ് ചിങ്ങോലിൽ, മാനേജിംഗ് കമ്മിറ്റി അംഗങ്ങളായ സിറിൾ എസ് .മാത്യു, ഗംഗാറാം കണ്ണമ്പള്ളി, സ്റ്റാഫ് സെക്രട്ടറി രാജീവ്, പി .ടി .എ വൈസ് പ്രസിഡന്റ് കാട്ടൂർ ബഷീർ, മാതൃ സമിതി പ്രസിഡന്റ് സുധീന അൻസർ എന്നിവർ സംസാരിച്ചു. സ്കൂൾ മാനേജർ മായാ ശ്രീകുമാർ സ്വാഗതവും ജനറൽ കൺവീനർ വി .സജിത് നന്ദിയും പറഞ്ഞു. തുടർന്ന് അദ്ധ്യാപികയും മാനേജിംഗ് കമ്മിറ്റി അംഗവുമായ മീരാ സിറിളിന്റെ നേതൃത്വത്തിൽ നൃത്ത പരിപാടിയും ഫ്ളവേഴ്സ് ടോപ് സിംഗേഴ്സ് ആയ ആദിത്യൻ സൂര്യനാരായൺ പ്രേം രാജ് എന്നിവർ നയിച്ച ഗാന സന്ധ്യയും അരങ്ങേറി.