കൊട്ടാരക്കര: പൂയപ്പള്ളി ഫെഡറൽ ബാങ്കിന് സമീപം ആംബുലൻസും സ്കൂട്ടറും കൂട്ടിയിടിച്ച് മുത്തച്ഛനും ചെറുമകനും മരിച്ചു. ഉമ്മന്നൂർ പാറങ്കോട് വിജയ മന്ദിരത്തിൽ മനോഹരൻ (63), ഇദ്ദേഹത്തിന്റെ മകൾ ഗിരിജയുടെയും കല്ലുവാതുക്കൽ നടയ്ക്കൽ വയലിൽ വീട്ടിൽ രാമലിംഗത്തിന്റെയും മകൻ ശ്യാം (19) എന്നിവരാണ് മരിച്ചത്.

ഇന്നലെ രാവിലെ 6.45 ഓടെയായിരുന്നു അപകടം. വെളിയം ഭാഗത്ത് നിന്ന് പൂയപ്പള്ളിയിലേയ്ക്ക് പോവുകയായിരുന്ന സ്കൂട്ടർ ഫെഡറൽ ബാങ്കിന് സമീപത്തെ വളവിൽ ബൈക്കിനെ മറികടക്കുന്നതിനിടയിൽ എതിർദിശയിൽ വന്ന ആംബുലൻസുമായി കൂട്ടിയിടിക്കുകയായിരുന്നു. മനോഹരൻ സംഭവസ്ഥലത്തും ശ്യാം ആശുപത്രിയിലേയ്ക്ക് കൊണ്ടുപോകും വഴിക്കുമാണ് മരിച്ചത്. സ്കൂട്ടർ പൂർണമായും തകർന്നു. കഴിഞ്ഞ ദിവസം മുത്തച്ഛന്റെ വീട്ടിലെത്തിയ ശ്യാം ഇന്നലെ രാവിലെ മുത്തച്ഛനൊപ്പം നടയ്ക്കലിലെ വീട്ടിലേക്ക് സ്കൂട്ടറിൽ തിരികെ പോകുമ്പോഴായിരുന്നു അപകടം. മൃതദേഹങ്ങൾ മോർച്ചറിയിൽ. സംസ്കാരം പിന്നീട്. പൂയപ്പള്ളി പൊലീസ് മേൽനടപടി സ്വീകരിച്ചു. മനോഹരന്റെ ഭാര്യ: രാജമ്മ. മറ്റൊരുമകൾ: ഗീത. മരുമകൻ: മണിലാൽ. ശ്യാമിന്റെ സഹോദരി: ഗീതു.