ഇന്ന് ശ്രീനാരായണ പെൻഷണേഴ്‌സ് കൗൺസിൽ പ്രതിഷേധം

കൊല്ലം: ശ്രീനാരായണ ഓപ്പൺ യൂണിവേഴ്സിറ്റിയുടെ ലോഗോയിൽ നിന്ന് ഗുരുദേവന്റെ രൂപം ഒഴിവാക്കിയത് ഗൂഢാലോചനയുടെ ഭാഗമാണെന്നും ഈ ലോഗോ പിൻവലിക്കണമെന്നും എസ്.എൻ.ഡി.പി യോഗം ശ്രീനാരായണ പെൻഷണേഴ്‌സ് കൗൺസിൽ ആവശ്യപ്പെട്ടു. കാലടി ശ്രീശങ്കരാചാര്യ സർവകലാശാലയുടെ ലോഗോയിൽ ശങ്കരാചാര്യരുടെ വ്യക്തമായ ചിത്രമുണ്ട്. ആ മാതൃക പിൻതുടരുന്നതിന് പകരം ആധുനികമാതൃകയെന്ന പേരിൽ തികഞ്ഞ അവഹേളനമാണ് നടത്തിയത്.
ഗുരുദേവൻ ഇരിക്കുന്നത് മുകളിൽ നിന്നു നോക്കിയാൽ കാണുംവിധം ലോഗോയിൽ ചിത്രീകരിച്ചിട്ടുണ്ടെന്ന തെറ്റായ അവകാശവാദമാണ് യൂണിവേഴ്സിറ്റി അധികൃതർ ഉയർത്തുന്നത്. അത്തരത്തിലുള്ള കാഴ്ച ലോഗോയിൽ ലഭ്യമല്ലെന്ന് കലാമേഖലയിലെ വിദഗ്ദ്ധർ അഭിപ്രായപ്പെടുന്നു. ഈ സാഹചര്യത്തിൽ മുഖ്യമന്ത്രി വിഷയത്തിലിടപെടണം. ലോഗോ തിരഞ്ഞെടുത്ത സമിതിയിലെ അംഗങ്ങളാരൊക്കെയാണെന്ന് വ്യക്തമാക്കണം. യൂണിവേഴ്സിറ്റിയുടെ വിജ്ഞാപനപ്രകാരം കലാകാരൻമാർ അയച്ചു നൽകിയ ലോഗോകൾ പുനർമൂല്യനിർണയം നടത്തി ഗുരുദേവന്റെ രൂപം വ്യക്തമായി ഉൾച്ചേരുന്ന കലാമൂല്യമുള്ള ലോഗോ തിരഞ്ഞെടുക്കണം.

ലോഗോ പിൻവലിക്കണം എന്നാവശ്യപ്പെട്ട് യൂണിവേഴ്സിറ്റിക്ക്‌ മുന്നിൽ ഇന്ന് രാവിലെ 10ന് പ്രതിഷേധം സംഘടിപ്പിക്കുമെന്നും മുഖ്യമന്ത്രി, ചാൻസലർ, വൈസ് ചാൻസലർ തുടങ്ങിയവർക്ക് പരാതി നൽകുമെന്നും ശ്രീനാരായണ പെൻഷണേഴ്‌സ് കൗൺസിൽ കോ ഒാർഡിനേറ്റർ പി.വി. രജിമോൻ, സെക്രട്ടറി സജീവ് കെ.എം എന്നിവർ അറിയിച്ചു.