കയ്പമംഗലം: കളപ്പുരയ്ക്കൽ ചന്ദ്രന്റെ അപൂർവ്വനാണയ ശേഖരം ആറന്മുള പൈതൃകഗ്രാമ മ്യൂസിയത്തിലേക്ക്. പാഴ് വസ്തുക്കളിൽ നിന്ന് കരകൗശല വസ്തുക്കളും നിത്യോപയോഗ സാമഗ്രികളും നിർമ്മിച്ച് ശ്രദ്ധേയനാണ് പെരിഞ്ഞനം ഓണപ്പറമ്പ് സ്വദേശി കളപ്പുരക്കൽ ചന്ദ്രൻ.

പൂക്കാവടികൾ, തെയ്യം, ഫ്‌ളവർ വേയ്‌സ്, മൊബൈൽ സ്റ്റാൻഡ്, പുള്ളുവൻ കുടം, കൊതുമ്പുവള്ളം, വിവിധങ്ങളായ ചൂലുകൾ തുടങ്ങി നിരവധി വസ്തുക്കളാണ് ഇദ്ദേഹം പാഴ്‌വസ്തുക്കളിൽ നിന്നും നിർമ്മിക്കുന്നത്. പ്രാഥമിക വിദ്യാഭ്യാസത്തിന് ശേഷം നാടുവിട്ട ചന്ദ്രൻ വിവിധ സംസ്ഥാനങ്ങളിൽ സഞ്ചരിക്കുകയും നിരവധി കരകൗശല വ്യാപാര സ്ഥാപനങ്ങളിലും മ്യൂസിയങ്ങളിലും ജോലി ചെയ്യുകയും ചെയ്തിട്ടുണ്ട്. ഈവിധം ആർജിച്ചെടുത്ത കഴിവുകൾ വികസിപ്പിച്ചാണ് നാട്ടിലെത്തിയ ശേഷം കലാപ്രവർത്തനങ്ങൾക്ക് തുടക്കമിട്ടത്.

വിവിധ രാജ്യങ്ങളിലെ വളരെ പഴക്കം ചെന്നതും പുതിയതുമായ 100 കണക്കിന് നാണയങ്ങളുടെയും നോട്ടുകളുടെയും ശേഖരം ചന്ദ്രനുണ്ട്. സ്‌കൂളുകൾ ലൈബ്രറികൾ, സാംസ്‌കാരിക കൂട്ടായ്മകൾ, കുട്ടികളുടെ ക്യാമ്പുകൾ എന്നിവിടങ്ങളിൽ സജീവസാന്നിദ്ധ്യമാണ് ഇദ്ദേഹം. കഴിഞ്ഞ ദിവസം മുൻ മിസോറാം ഗവർണർ ശ്രീകുമ്മനം രാജശേഖരൻ ചന്ദ്രന്റെ വസതി സന്ദർശിച്ച് ആദരിച്ചിരുന്നു. കുമ്മനത്തിൽ നിന്ന് പൈതൃകഗ്രാമ മ്യൂസിയത്തെ കുറിച്ച് അറിഞ്ഞതിന് ശേഷമാണ് തന്റെ ശേഖരത്തിലെ അപൂർവ്വനാണയങ്ങൾ സമർപ്പിക്കാൻ ആഗ്രഹം പ്രകടിപ്പിച്ചത്.