തൃശൂർ: ജില്ലയിൽ പ്രവർത്തനമാരംഭിച്ച തിയറ്ററുകളിൽ ജില്ലാ മെഡിക്കൽ ഓഫീസിന്റെയും തൃശൂർ സെവൻ കേരള ഗേൾസ് എൻ.സി.സി ബറ്റാലിയന്റെയും ആഭിമുഖ്യത്തിൽ ബോധവത്കരണം നടത്തി. സാമൂഹിക അകലം, വ്യക്തി ശുചിത്വം തുടങ്ങിയ കൊവിഡ് പ്രോട്ടോകോൾ പാലിക്കുന്നതിന് വേണ്ട ബോധവത്കരണ സന്ദേശങ്ങളാണ് രാവിലെ 9നും ഉച്ചയ്ക്ക് 12നുമുള്ള ഷോകൾക്ക് മുൻപ് നൽകിയത്.

ചലച്ചിത്ര മേഖലയിലെ അനിശ്ചിതാവസ്ഥ കണക്കിലെടുത്ത് തിയറ്ററുകൾ തുറന്ന് പ്രവർത്തിക്കാൻ സർക്കാർ അനുമതി നൽകിയിരുന്നു. ഒരു വർഷമായുള്ള കൊവിഡ് വ്യാപന ഭീതിയിൽ നിന്നും കേരളം സാധാരണ നിലയിലേക്ക് തിരിച്ചു വരുന്നതിന്റെ ഭാഗമായി വിവിധ തൊഴിൽ മേഖലകൾ ഇത്തരത്തിൽ പ്രവർത്തനമാരംഭിക്കുന്നുണ്ട്. കൊവിഡ് 19 നിലനിൽക്കുന്ന സാഹചര്യത്തിൽ തിയറ്ററുകൾ തുറക്കുന്നതിന് അതീവ ജാഗ്രത പുലർത്താൻ നിർദേശമുണ്ടായിരുന്നു. ഈ സാഹചര്യത്തിലാണ് ആരോഗ്യ വകുപ്പിന്റെയും എൻ.സി.സിയുടെയും ഇടപെടൽ. സെവൻ കേരള ഗേൾസ് ബറ്റാലിയൻ കമൻഡിംഗ് ഓഫീസർ കേണൽ ജോസഫ് ആന്റണി, ജില്ലാ മെഡിക്കൽ ഓഫീസർ ഡോ. കെ.ജെ റീന, ഇൻസ്ട്രക്ടർ മഞ്ജു മോഹൻ തുടങ്ങിയവർ പരിപാടിക്ക് നേതൃത്വം നൽകി.