ചാവക്കാട്: പേരകം ശ്രീതേക്കിൻകാട് ഭഗവതി ക്ഷേത്രത്തിൽ മകരച്ചൊവ്വ മഹോത്സവം ക്ഷേത്രസംരക്ഷണ സമിതിയുടെ ആഭിമുഖ്യത്തിൽ ഭക്തിസാന്ദ്രമായി നടന്നു. രാവിലെ മുതൽ നിർമ്മാല്യദർശനം, തുടർന്ന് വാകചാർത്ത്, മലർനിവേദ്യം, കേളി, ഉഷപൂജ, എതിർത്ത് പൂജ, നിവേദ്യം ഉച്ചപൂജ എന്നിവ നടന്നു. ക്ഷേത്രം മേൽശാന്തി ബാലചന്ദ്രൻ എമ്പ്രാന്തിരി മുഖ്യ കാർമ്മികത്വം വഹിച്ചു.
ദീപാരാധന, കനലാട്ടം, മഞ്ഞലാട്ടം, നടയ്ക്കൽ പറ പള്ളിത്താഴം എഴുന്നള്ളിപ്പ്, തുടർന്ന് താഴത്തെ കാവ് വടക്കുംവാതിക്കൽ കുരുതി തർപ്പണത്തോടെ സമാപനമായി. ആഘോഷം ഇല്ലാതെ കൊവിഡ് മാനദണ്ഡങ്ങൾ പാലിച്ചാണ് ചടങ്ങുകൾ നടന്നത്‌. ക്ഷേത്ര കമ്മിറ്റി ഭാരവാഹികളായ പ്രസിഡന്റ് വേണു ഗോപാൽ കരിപ്പോട്ട്, സെക്രട്ടറി ശശി ആനക്കോട്ടിൽ, ഉത്സവാഘോഷ കമ്മിറ്റി ചെയർമാൻ ബാലചന്ദ്രൻ മടപ്പാട്ട്, കൺവീനർ എ. വേലായുധകുമാർ, ഇ.പി. സുകുമാരൻ, കെ.വി. കൃഷ്ണദാസ്, സുധാകരൻ മുണ്ടന്തറ, കെ.വി. ദാസൻ എന്നിവർ പരിപാടിക്ക് നേതൃത്വം വഹിച്ചു.