പാവറട്ടി: അംബേദ്കർ ഗ്രാമവികസന പദ്ധതി പ്രകാരം ഒരുകോടി രൂപ ചെലവഴിച്ച് നിർമ്മാണം പൂർത്തീകരിച്ച മുല്ലശ്ശേരി പഞ്ചായത്തിലെ മതുക്കര പട്ടികജാതി മാതൃകാ കോളനിയുടെ ഔപചാരിക ഉദ്ഘാടനം ഫെബ്രുവരി 9ന് മുഖ്യമന്ത്രി വീഡിയോ കോൺഫറൻസിലൂടെ നിർവഹിക്കും. പട്ടികജാതി പട്ടിക വർഗ്ഗ പിന്നോക്ക സമുദായക്ഷേമ വകുപ്പു മന്ത്രി അദ്ധ്യക്ഷത വഹിക്കും. മുരളി പെരുനെല്ലി എം.എൽ.എ ശിലാഫലകം അനാച്ഛാദനം ചെയ്യും.
ബ്ലോക്ക് പഞ്ചായത്ത് ഓഫീസിൽ നടന്ന അവലോകന – സംഘാടക സമിതി യോഗത്തിൽ മുരളി പെരുനെല്ലി എം.എൽ.എ. അദ്ധ്യക്ഷനായി. ബ്ലോക്ക് പഞ്ചായത്ത് പ്രസിഡന്റ് ലതി വേണുഗോപാൽ, ഗ്രാമ പഞ്ചായത്ത് പ്രസിഡന്റ് ശ്രീദേവി ജയരാജ്, ജനപ്രതിനിധികളായ നിഷ സുരേഷ്, ഇ.വി. പ്രഭീഷ്, ബിന്ദു സത്യൻ, ദിൽന ധനേഷ്, എസ്.സി.ഡി.ഒ അരുൺ ജ്യോതി ജെ.ആർ, മോണിറ്ററിംഗ് കമ്മിറ്റി അംഗങ്ങൾ തുടങ്ങിയവർ സംബന്ധിച്ചു.
മുരളി പെരുനെല്ലി എം.എൽ.എ (ചെയർമാൻ), ലതി വേണുഗോപാൽ (വൈസ് ചെയർമാൻ), എസ്.സി.ഡി.ഒ അരുൺ ജ്യോതി ജെ.ആർ (കൺവീനർ), ശ്രീദേവി ജയരാജ് (ട്രഷറർ), കെ.എസ്. ഷൈജു (ജോ. കൺവീനർ) എന്നിവരെ സംഘാടക സമിതി ഭാരവാഹികളായി തെരെഞ്ഞെടുത്തു.

............................................

പദ്ധതി ഉൾപ്പെടുത്തിയിരിക്കുന്നത്

55 പട്ടികജാതി കുടുംബക്കാർ ഗുണഭോക്താക്കളായി വരുന്ന പദ്ധതി

ആരോഗ്യ സബ് സെന്റർ കെട്ടിടം

വിജ്ഞാൻ വാടി കെട്ടിടം (കമ്പ്യൂട്ടർ, പ്രിന്റർ, സ്‌കാനർ, ടിവി അടക്കം)

18000 ലിറ്റർ വാട്ടർ ടാങ്ക്

കുടിവെള്ള വിതരണത്തിന് വീടുകളിലേക്ക് പൈപ്പുകൾ സ്ഥാപിക്കൽ

രണ്ടു പൊതു കിണറുകൾ അറ്റകുറ്റപണികൾ നടത്തൽ

വലിയ വാഹനങ്ങൾ വന്ന് തിരിച്ചുപോകുന്നതിനുള്ള സ്ഥലം വശം കെട്ടി ക്രമീകരിക്കൽ

22 വീടുകളുടെ അറ്റകുറ്റപണികൾ

വായനശാലയുടെ നവീകരണം

10 സോളാർ മിനിമാസ്റ്റ് ലൈറ്റുകൾ, ഒരു ഹൈമാസ്റ്റ് ലൈറ്റ്

55 വീടുകളിലും ഗാർഹികമാലിന്യം ഉറവിടത്തിൽ സംസ്‌കരിക്കുന്നതിന് ജൈവ, അജൈവ ബിന്നുകളുടെ വിതരണം