തിരുവനന്തപുരം: സംസ്ഥാനത്ത് ഇന്നലെ 4991 പേർക്ക് കൂടി കൊവിഡ് സ്ഥിരീകരിച്ചു. ഇതോടെ ചികിത്സയിലുള്ളവർ 65,054 ആയെന്ന് മുഖ്യമന്ത്രി പിണറായി വിജയൻ അറിയിച്ചു.

എറണാകുളം 602, മലപ്പുറം 511, പത്തനംതിട്ട 493, കോട്ടയം 477, കോഴിക്കോട് 452, തൃശൂർ 436, കൊല്ലം 417, തിരുവനന്തപുരം 386, ആലപ്പുഴ 364, കണ്ണൂർ 266, പാലക്കാട് 226, വയനാട് 174, ഇടുക്കി 107, കാസർകോട് 80 എന്നിങ്ങനെയാണ് വെള്ളിയാഴ്ചത്തെ രോഗബാധ.

ബ്രിട്ടനിൽ നിന്ന് വന്ന 37 പേർക്കാണ് ഇതുവരെ കൊവിഡ് സ്ഥിരീകരിച്ചത്. ഇവരെ ബാധിച്ചത് ജനിതകമാറ്റമുണ്ടായ വൈറസാണോ എന്നറിയാൻ സാമ്പിളുകൾ പൂനെയിലെ നാഷണൽ വൈറോളജി ഇൻസ്റ്റിറ്റ്യൂട്ടിലേക്ക് അയച്ചിട്ടുണ്ട്.

ഇന്നലെ മൊത്തം 52,790 സാമ്പിളുകളാണ് പരിശോധിച്ചത്. പോസിറ്റിവിറ്റി നിരക്ക് 9.45 ആണ്. ഇന്നലെ 23മരണങ്ങളും സ്ഥിരീകരിച്ചു. ഇതോടെ ആകെ മരണം 3095 ആയി. ഇന്നലെ രോഗം സ്ഥിരീകരിച്ച 94 പേർ സംസ്ഥാനത്തിന് പുറത്ത് നിന്ന് വന്നവരും 59 പേർ ആരോഗ്യപ്രവർത്തകരുമാണ്.. 4413 പേർക്ക് സമ്പർക്ക രോഗികളാണ്. 425 പേരുടെ ഉറവിടം വ്യക്തമല്ല.ഇന്നലെ 5111 പേർക്ക് രോഗം ഭേദമായി.