കാസർകോട്: ചെർക്കള മുതൽ കാസർകോട് ടൗൺ വരെയുള്ള ജനങ്ങളുടെ ഉപ്പ് വെള്ള പ്രശ്നത്തിന് ശാശ്വത പരിഹാരമായി ബാവിക്കര കുടിവെള്ള പദ്ധതി ഫെബ്രുവരി മാസത്തിൽ ഉദ്ഘാടനം ചെയ്യുന്നു. കളക്ടറേറ്റ് മെയിൻ കോൺഫറൻസ് ഹാളിൽ കെ. കുഞ്ഞിരാമൻ എം.എൽ.എയുടെ അദ്ധ്യക്ഷതത്തിൽ ചേർന്ന ഉദുമ മണ്ഡലം വികസന യോഗത്തിലാണ് തീരുമാനം. ജില്ലാ കളക്ടർ ഡോ. ഡി. സജിത് ബാബു തുടങ്ങിയ ജില്ലയിലെ എല്ലാ ജില്ലാ തല ഉദ്യോഗസ്ഥരും പങ്കെടുത്തു. മണ്ഡലത്തിൽ സ്കൂൾ കെട്ടിടം, ആശുപത്രി കെട്ടിടം, റോഡുകൾ, പാലങ്ങൾ തുടങ്ങി 100ൽ പരം പ്രവർത്തികളുടെ ഉദ്ഘാടനമാണ് ഉദുമ മണ്ഡലത്തിൽ നടത്താൻ പോകുന്നത്. 5 കോടി രൂപ ചെലവിൽ നിർമ്മിച്ച പെരിയ ഹൈസ്കൂൾ കെട്ടിടം ഉദ്ഘാടനം ചെയ്യും. ഉദുമ മണ്ഡലത്തിലെ വികസന വിപ്ലവത്തിൽ എടുത്തു പറയാവുന്ന തെക്കിൽ-ആലട്ടി റോഡ്‌, കുറ്റിക്കോൽ-ബോവിക്കാനം റോഡും ഉദ്ഘാടനം ചെയ്യും. 5 കോടി രൂപ ചെലവിൽ നിർമ്മിച്ച സർക്കാരിന്റെ കീഴിലുള്ള ഏറ്റവും വലിയ ബേഡകത്തെ ആട് ഫാം ഉദ്ഘാടനം ചെയ്യും. കീഴൂർ തീരദേശ പൊലീസ് സ്റ്റേഷനും ഉദ്ഘാടനം ചെയ്യും. മുഖ്യമന്ത്രിയും വിവിധ വകുപ്പ് മന്ത്രിമാരും വിവിധ പ്രവർത്തികളുടെ ഉദ്ഘാടനം നിർവഹിക്കും. പെരിയ, മുളിയാർ ആശുപത്രിയിലെ ഡയാലിസിസ് സെന്റർ ഫെബ്രുവരി 15ന് ഉദ്ഘാടനം ചെയ്യും. പള്ളിക്കര ആശുപത്രിയുടെ പുതിയ കെട്ടിടവും ഉദ്ഘാടനം ചെയ്യും. ബാവിക്കരയിൽ നിന്ന് ചട്ടംചാലിലും കുന്നുപാറയിലും ടാങ്ക് നിർമിച്ച് കുടിവെള്ളം വിതരണം ചെയ്യുന്ന 88 കോടി രൂപ ചെലവ് വരുന്ന കുടിവെള്ള പദ്ധതിയുടെ പ്രവർത്തി ഉദ്ഘാടനവും നടത്തും.